இணையத்தில் பயனர்களின் தனிப்பட்ட தகவல்களை மேலும் பாதுகாக்கும் நோக்கில், சமூக ஊடகமான வாட்ஸ்அப் ரகசியக் கட்டுப்பாட்டு அமைப்புகளில் புதிய தெரிவுகளை அறிமுகப்படுத்தியுள்ளது.
அதன்படி, தங்களது முகப்புப் படம் (Profile Photo), தங்களைப் பற்றிய தகவல்கள் (About), கடைசியாகப் பார்த்தது (Last Seen) ஆகியவற்றைத் தங்களது தொடர்புகளின் பட்டியலில் இருக்கும் யார் யார் பார்க்கலாம் என்பதைப் பயனர்கள் முடிவுசெய்யலாம்.
அனைவரும், தொடர்புப் பட்டியலில் (contact list) இருப்போர் மட்டும், தொடர்புப் பட்டியலில் உள்ள இவர்களைத் தவிர்த்து, எவருமில்லை என்ற நான்கு தெரிவுகளில் ஏதேனும் ஒன்றைப் பயனர்கள் தேர்வுசெய்யலாம்.
"பயனர்கள் மற்றும் அவர்கள் அனுப்பும் செய்திகளின் பாதுகாப்பை நாங்கள் முக்கியமாகக் கருதுகிறோம். வாட்ஸ்அப் பயன்படுத்தும்போது பயனர்கள் பாதுகாப்பாக இருப்பதற்கு உதவ நாங்கள் வடிவமைத்துள்ள அம்சங்களையும் வசதிகளையும் அவர்கள் தெரிந்துகொள்ள வேண்டும் என விரும்புகிறோம்," என்று வாட்ஸ்அப் தனது 'அடிக்கடி கேட்கப்படும் வினாக்கள்' பக்கத்தில் குறிப்பிட்டுள்ளது.
அத்துடன், பயனர்கள் தாங்கள் பகிர்ந்துகொள்வது தொடர்பில் கவனமாக இருக்க வேண்டும் என்றும் வாட்ஸ்அப் அறிவுறுத்தி இருக்கிறது.
"பயனர்கள் தங்களுடன் வாட்ஸ்அப் வழியாக இணைந்து இருப்பவர்களுடன் பகிர்ந்துகொள்ளும் தகவல்கள் குறித்து கவனமாக முடிவெடுக்கும்படி ஊக்குவிக்கிறோம். ஒருவர் ஓர் உரையாடல், படம், கோப்பு அல்லது குரல்பதிவு ஆகியவற்றை வாட்ஸ்அப் வழியாகப் பிறருடன் பகிர்ந்துகொள்ளும்போது, அவரிடமும் அவற்றின் நகல் இருக்கும் என்பதை நினைவில் கொள்ளுங்கள். அவர்கள் விரும்பினால் மற்றவர்களுக்கும் அவற்றை அனுப்ப முடியும்," என்று வாட்ஸ்அப் தெரிவித்து இருக்கிறது.
அதுபோல, தமது தற்போதைய இருப்பிடம் குறித்து நேரலையாகப் பிறருடன் பகிர்ந்துகொள்ளும் வசதி வாட்ஸ்அப்பில் இருக்கிறது. ஆயினும், நம்பகமானோருடன் மட்டுமே அதனைப் பகிர்ந்துகொள்ளும்படி வாட்ஸ்அப் அறிவுறுத்தியுள்ளது.