மாணவர் முரசு
இ-பேப்பர்
மோனலிசா
கவனக்குறை மிகைச்சுறுதி குறைபாடு (ADHD) குறித்து முதன்முதலாகத் தமிழில் உருவாக்கப்பட்டுள்ள குறுந்தளத்தை 'அன்லாக்கிங் ஏடிஎச்டி' எனும் தொண்டு நிறுவனம் அண்மையில் அறிமுகப்படுத்தியது.
"ஏடிஎச்டி குறைபாடு பற்றிய பல பயனுள்ள தகவல்களை ஒன்றுதிரட்டி முதன்முதலாக தமிழ்மொழியில் உருவாக்கப்பட்டுள்ள குறுந்தளம் ஒரு சிறந்த முயற்சி. அந்தக் குறைபாட்டிற்கான அறிகுறிகள், சிகிச்சை முறைகள் உள்ளிட்ட பல தகவல்களையும் உள்ளடக்கிய இந்த குறுந்தளம், அதுகுறித்து மக்களிடம் விழிப்புணர்வூட்டி, தக்க ஆலோசனைகளையும் சரியான வழிகாட்டுதலையும் வழங்க பெரிதும் உதவும்," என்று சுகாதார மூத்த துணை அமைச்சர் டாக்டர் ஜனில் புதுச்சேரி கூறினார்.
https://www.unlockingadhd.com/ta/ என்ற முகவரியைக் கொண்ட இக்குறுந்தள அறிமுக நிகழ்ச்சி இம்மாதம் 1ஆம் தேதி இடம்பெற்றது.
"ஏடிஎச்டி குறைபாடு பற்றிய விழிப்புணர்வு மக்களுக்கு ஏற்பட வேண்டும். இந்தக் குறைபாட்டை தொடக்க நிலையிலேயே கண்டறிந்துவிட்டால் தக்க உதவியையும் சரியான சிகிச்சைமுறைகளையும் பின்பற்றி, நல்ல முன்னேற்றம் காண இயலும்," என்றார் 'அன்லாக்கிங் ஏடிஎச்டி' நிறுவனர் மூன்லேக் லீ.
'ஸூம்' வழி நடந்தேறிய குறுந்தள அறிமுக நிகழ்ச்சியின்போது 'ஏடிஎச்டி கண்டறிதல் மற்றும் சமாளித்தல்' எனும் கருத்தரங்கும் இடம்பெற்றது.
அக்கருத்தரங்கில் கலந்துகொண்டு பேசிய உளவியல் வல்லுநர் எஸ்.சி.அன்பரசு, "ஏடிஎச்டி என்பது சிறுவயது முதலே நரம்பியல் வளர்ச்சியில் ஏற்படும் குறைபாடு ஆகும். கவனச்சிதறல், மிகைச் செயல்பாடு, அன்றாடப் பணிகளில் மறதி, பொறுமையின்மை போன்ற அறிகுறிகள் மூலம் அதனைக் கண்டறிய இயலும். நினைவாற்றலைத் தூண்டுதல், புலனுணர்வு சார்ந்த சிகிச்சை, மருந்தியல் சிகிச்சை, நடத்தை சார்ந்த சிகிச்சை போன்றவை மூலம் அக்குறைபாட்டின் தீவிரத்தைக் குறைக்க முடியும்," என்றார்.
சுகாதார உளவியலாளராகப் பயிற்சி பெற்றுவரும் சஞ்சனா பிரபாகர், 20, "ஏடிஎச்டி குறைபாடு உள்ளோரால் கல்வியிலும் பிறவற்றிலும் முன்னிலை பெற இயலாது என்னும் தவறான மனப்பான்மையால் என்னிடம் இருந்த இக்குறைபாட்டை கண்டறியப் பல ஆண்டுகள் ஆனது. சிறுவயது முதலே எல்லாவற்றிலும் சிறந்து விளங்க வேண்டும் என்ற உந்துதல் நாளடைவில் அதிக மனயிறுக்கத்தை ஏற்படுத்தி, பின்னாளில் அதுவே என்னுடைய செயல்திறனைக் குறைத்து, கவனத்தைச் சிதறடித்தது," என்றார்.
மருத்துவரை அணுகி உரிய சிகிச்சைகள் எடுத்துக்கொள்வதாலும், சரியான உணவுப் பழக்கங்களை கடைப்பிடிப்பதாலும், யோகா, தியானம் போன்ற பயிற்சிகளாலும் ஏடிஎச்டி குறைபாட்டின் தீவிரம் குறைந்து நல்ல முன்னேற்றம் கண்டுள்ளதாக அவர் மகிழ்வுடன் தெரிவித்தார். 'அன்லாக்கிங் ஏடிஎச்டி' நிறுவனத்துடன் இணைந்து தொண்டூழியம் செய்து வரும் இவர், தன்னைப்போல் பாதிக்கப்பட்டவர்களுக்கு ஊக்கம் அளித்தும் தேவையான உதவிகளையும் செய்து வருகிறார்.
"இதுபோன்ற ஒரு குறைபாட்டினால் பாதிக்கப்பட்டுவிட்டோமே என்று கவலைப்படுவதைவிட அதைச் சரிசெய்து வாழ்வைச் செம்மைப்படுத்தும் மனப்பான்மையை வளர்த்துக்கொள்வது மிகவும் அவசியம். ஏடிஎச்டி குறைபாடு உடையோரை அவர்களின் நண்பர்களும் குடும்பத்தினரும் புரிந்துகொண்டு, நல்லதொரு சூழலை உருவாக்கித் தருவது அவர்களுக்குப் பேருதவியாக இருக்கும்," என்றார் கால்நடை மருத்துவரான ஜனனிபிரியா கிருஷ்ணசாமி, 30.
ஏடிஎச்டியால் பாதிக்கப்பட்டுள்ள பாஹியா பஷீர், 20, "தொடக்ககால பாலர் பருவ மேம்பாட்டில் பட்டயம் பயின்றபோதுதான் எனக்கும் அக்குறைபாடு இருப்பதைத் தெரிந்துகொண்டேன். உடனே அதற்கு சிகிச்சை பெறத் தொடங்கினேன். என்னைப் போன்றோருக்கு உதவும் நோக்கில் 'அன்லாக்கிங் ஏடிஎச்டி' நிறுவனத்துடன் இணைந்து தொண்டூழியமும் செய்துவருகிறேன்," என்று கூறினார்.
ஏடிஎச்டி குறைபாட்டினை மருத்துவர் மூலம் கண்டறிவதன் அவசியம், அறிகுறிகள், அக்குறைபாடு இருப்பதை அறியாததால் ஏற்படும் விளைவுகள் என்பன போன்ற பல விவரங்களும் இந்நிகழ்வில் கலந்துரையாடப்பட்டன.
