சிராங்கூன் ரோட்டிலுள்ள ‘உஸ்மான்’ஸ் ரெஸ்ட்ரோன்ட்’ (Usman's Restaurant) உணவகத்திற்கு வெளியில் கடந்த வெள்ளிக்கிழமை நடந்த கைகலப்பில் 41 வயது ஆடவர் மருத்துவமனைக்கு அனுப்பப்பட்டார்.
ஹனி என்ற ஸ்டாம்ப் செய்தித்தள வாசகர், அப்பொழுது பின்னிரவு நேரத்தில் தமது மகனுடன் உஸ்மான் உணவகத்தில் சாப்பிட்டுக்கொண்டிருந்தபோது உணவகத்திற்கு வெளியில் சிலர் ஆடவர் ஒருவரை அடித்துக்கொண்டிருந்ததைக் கண்டதாகத் தெரிவித்தார். சம்பவத்தைக் காணொளி எடுத்த ஹனி, சம்பவ இடத்திற்குப் போலிசார் அழைக்கப்பட்டதாக கூறினார்.
ஹனி பகிர்ந்த காணொளியில் வெள்ளை சட்டை அணிந்திருந்த ஒருவர் மற்றொருவரைப் பலமுறை குத்தியதும் சுற்றியிருந்தவர்கள் அவரைத் தடுக்க முயன்றதும் காணப்பட்டது.
238 சிராங்கூன் ரோட்டில் ஒருவர் மற்றொருவரை வேண்டுமென்றே காயப்படுத்த முயன்ற சம்பவம் குறித்த தகவல் தெரிவிக்கப்பட்டதாக போலிசார் கூறினர். “இந்தச் சம்பவத்தில் 41 வயது ஆடவர் ஒருவர் சுயநினைவுடன் சிங்கப்பூர் பொது மருத்துவமனைக்குக் கொண்டு செல்லப்பட்டார்,” என்று அவர்கள் தெரிவித்தனர்.