மாணவர் முரசு
இ-பேப்பர்
நான் கடந்த பத்து ஆண்டுகளாக ஒரு கண் நோயோடு (கெரடோகோனஸ்) போராடிக்கொண்டிருக்கிறேன். இது எந்த வகையிலும் உயிருக்கு ஆபத்தானதில்லை என்றாலும், எனது கண் பார்வையில் ஒரு பகுதியை நான் இழந்துவிட்டேன். அதன்பிறகு, எனது சமநிலை மற்றும் தொலைதூரப் பார்வையும் பாதிக்கப்பட்டுள்ளன. இதன் விளைவு என்னவென்றால், கடந்த எட்டு ஆண்டுகளாக நான் அதிக உடற்பயிற்சியில் ஈடுபடுவதை நிறுத்திவிட்டேன். எங்கு கீழே விழுந்துவிடுவோமோ என்று நான் தொடர்ந்து பயந்ததால் நான் என் தன்னம்பிக்கையை இழந்து தவித்தேன்.
இதன் விளைவாக என் உடல் எடை அதிகரிக்கத் தொடங்கியது. 2019ஆம் ஆண்டில் ஒரு மருத்துவ நிபுணரிடம் இருந்து ஆலோசனைபெற்று, ஒரு கலப்பு தற்காப்புக் கலை உடற்பயிற்சிக் கூடத்தில் பதிவு செய்ய முடிவு செய்தேன். அங்கு என்ன மாதிரியான பயிற்சிகள் வழங்கப்படுகின்றன என்பது பற்றி எனக்கு முதலில் அதிகம் தெரியாது. இதில் சேர்வது ஒரு எளிதான முடிவல்ல. தீவிர யோசனைக்குப் பிறகு நான் Evolve MMA என்ற உடல்பயிற்சி நிலையத்தில் சேர்ந்தேன். அங்குள்ள பயிற்றுவிப்பாளர்கள் மிகவும் திறமைசாலிகள், எளிதாக அணுகக்கூடியவர்கள். என்னை அவர்கள் நன்றாகவும் பொறுமையாகவும் கவனித்தனர்.
‘முவே தாய்’ கலையுடன் நான் எனது தற்காப்புக் கலை பயணத்தைத் தொடங்கினேன். “தாய் குத்துச்சண்டை” என்று குறிப்பிடப்படும் முவே தாய், ஒரு போர் விளையாட்டு. இதை “எட்டு கரசரணாதிகள் கலை” என்றும் அழைக்கப்படுகிறது. ஏனெனில் இது கைமுட்டிகள், முழங்கைகள், முழங்கால்கள் மற்றும் தாடைகளின் ஒருங்கிணைந்த பயன்பாட்டால் செயல்படுகிறது.
முதல் வகுப்பில் எனக்கு மூச்சுத் திணறியது. இருப்பினும் நான் மகிழ்ச்சி அடைந்தேன். இழந்த தன்னம்பிக்கையை மீண்டும் வரும்வரை நான் தொடர்ந்து முயற்சி செய்தேன்.
முதல் சில வகுப்புகள் மிகவும் கடினமாக இருந்தன. நான் புதிதாக பல விஷயங்களைக் கற்றுக்கொள்ள வேண்டியிருந்தது. இருப்பினும், இரண்டாவது வாரத்தில் எனது நம்பிக்கையும் ஆற்றலும் கூடின.
அடுத்தடுத்த மாதங்களில் உடலை வலிமைப்படுத்தும் வகுப்புகளிலும் நான் கலந்துகொள்ள ஆரம்பித்தேன். இதற்கிடையில், பலரும் பிரேசிலிய ‘ஜியு-ஜிட்சு’ தற்காப்புக் கலையில் ஈடுபட்டது எனக்குப் பொறாமையைத் தந்தது.
எதிராளியை தரையில் கொண்டுசெல்வது, அவரைக் கட்டுப்படுத்துவது, ஆதிக்கம் செலுத்துவது மற்றும் பல நுட்பங்களைப் பயன்படுத்தி கூட்டுப் பூட்டுகள் வழியாக ஒருவரை எப்படி வெல்வது என்பதை இது கற்றுக்கொடுக்கிறது.
இந்த தற்காப்புக் கலையில் ஈடுபட அப்போது எனக்கு தைரியம் இல்லை. இது அதிக உடல் தொடர்புகளைக் கொண்டிருந்தது. இருப்பினும் ஓராண்டு கழித்து, பயிற்றுவிப்பாளர்களின் ஊக்கத்துடன் எனது முதல் ‘ஜியு-ஜிட்சு’ மற்றும் மல்யுத்தம் வகுப்பிலும் கலந்துகொள்ள நான் முடிவு செய்தேன். இவை எனக்கு மேலும் பல பலன்களைக் வழங்கியுள்ளன.
தமிழ்ப் பெண்கள் பங்கேற்பு குறைவு
ஆனால் நான் கவனித்த ஒரு விஷயம் என்னவென்றால்; தற்காப்புக் கலைகள் கற்றுக் கொடுக்கப்படும் இந்த உடல்பயிற்சி நிலையத்தில் மிகக் குறைவான தமிழ்ப் பெண்களே உள்ளனர். இதற்குப் பல காரணங்கள் இருக்கலாம். தற்காப்புக் கலைகள் பெண்களுக்குப் பொருந்தாது என்று இளம் வயதிலிருந்தே பெண்களுக்குக் கூறப்பட்டு வருகிறது. பெண்கள் சராசரியாக ஆண்களைவிட சுறுசுறுப்பாக இருப்பதைப் பல ஆய்வுகள் கண்டறிந்துள்ளன.
ஆனாலும் பல பெண்கள் தற்காப்புக் கலைகளில் ஈடுபடுவதைத் தவிர்க்கிறார்கள். ஏனெனில், எதிராளியை எதிர்கொள்ள இது உடல் தொடர்பு கொண்ட ஒரு விளையாட்டாகும். நம் சமூகம் பொதுவாக இதுபோன்ற விளையாட்டுகளில் பெண்கள் பங்கேற்பதை ஊக்கப்படுத்துவதில்லை.
ஆனால் இதுபோன்ற தற்காப்புக் கலைகளில் ஈடுபடுவதன் மூலம் நான் பலனடைந்துள்ளேன். முதலாவதாக, தற்காப்புக் கலைகளைப் பயிலும் பெண்கள் பயனுள்ள தற்காப்பு சூழ்ச்சிகளைக் கற்றுக்கொள்கிறார்கள்.
‘முவே தாய்’, ‘ஜியு ஜிட்சு’ கலைகளை விடாமுயற்சியுடன் கற்றுக்கொள்வோர், தங்களை எவ்வாறு தற்காத்துக்கொள்ள வேண்டும் என்று தெரிந்துகொள்கின்றனர். அதையும் தாண்டி அபரிமிதமான பலத்தைப் பயன்படுத்துவதற்கு மாறாக தங்களைவிட பெரிதான அச்சுறுத்தல்களை எதிர்கொள்ள பெண்கள் உள்ளார்ந்த திறனை வளர்த்துக்கொள்கின்றனர்.
இரண்டாவதாக, உங்களை தற்காத்துக்கொள்ள அனுமதிக்கும் நகர்வுகளை நீங்கள் இணைத்துக்கொள்வதால், உங்களது தன்னம்பிக்கை அதிகரிப்பதுடன் பயமும் குறைகிறது.
தற்காப்புக் கலையில் ஈடுபடுவதன் மூலம் அன்றாட வாழ்க்கையில் உங்கள் சுய கட்டொழுங்கை மேம்படுத்தவும் முடியும். இது பெண்களுக்கு மட்டுமின்றி பெரியவர்களுக்கும் பொருந்தும்.
மூன்றாவதாக, தற்காப்புக் கலைக்கும் உடல் ரீதியாக சகிப்புத்தன்மை தேவைப்படுகிறது. உடல் ஆரோக்கியத்தையும் சீரான தசைகளையும் ஊக்குவிக்கும் வழிகளையும் நீங்கள் படிப்படியாக கற்றுக்கொள்வீர்கள். தற்காப்புக் கலைகள் மூலம் ‘மோட்டார்’ திறன்கள் மேம்படும். தற்காப்பு கலை வகுப்புகளில் மொத்த உடல் பயிற்சி மூலம் உடலில் இருந்து ஆயிரம் கேலரி களுக்கு மேல் குறைக்கலாம். இது உங்கள் நீண்டநாள் உடல்நிலைக்கு மிக உகந்தது.
இறுதியாக, தற்காப்புக் கலையில் ஈடுபடுவதால் பெண்களுக்கு மனஅழுத்தம் குறையும், மனநிலையில் நல்ல முன்னேற்றம் ஏற்படும். தற்காப்புக் கலை என்பது நீங்கள் பங்கேற்கக்கூடிய மிகவும் கடினமான நடவடிக்கைகளில் ஒன்றாகும். தோல்விகளையும் விமர்சனங்களையும் எதிர்கொள்ள இது உதவுகிறது.
அத்துடன் நீங்கள் உங்களைச் சுய மதிப்பீடு செய்துகொள்ளவும் முடியும். பயிற்சி எப்போதும் எளிதாக இருக்காது. இறுதியில் நீங்கள் மனதளவிலும் உடலளவிலும் வளர்ச்சி அடைய இது உதவுகிறது.
எனது பயணம் இப்போதுதான் ஆரம்பமாகியுள்ளது. சாத்தியக்கூறுகள் மற்றும் வாய்ப்புகள் நிறைந்த இந்தப் பயிற்சியைத் தொடங்கியபோது, எனக்கு அனுபவமும் திறமையும் மிகக் குறைவே.
ஆனாலும் இது எனக்கு பலன் அளிக்கும் அனுபவமாக இருந்தது. நான் வேண்டும் என்றே சண்டை, சச்சரவுகளில் ஈடுபட மாட்டேன். அந்த நோக்கத்திற்காக யாரும் இதுபோன்ற பயிற்சிக்குச் செல்லக்கூடாது.
ஆனால் தற்காப்புக் கலைகளைக் கற்றுக்கொள்வது சண்டை போடுவதற்கு மட்டுமல்ல. இது ஒவ்வொரு நாளும் நம்மை நாமே மேம்
படுத்திக்கொள்ள ஒரு சிறந்த வாய்ப்பை அளிக்கிறது. Evolve MMA உடற்பயிற்சி நிலையத்தில் உள்ள பயிற்றுவிப்பாளர்கள் வழங்கிய ஆலோசனை எனது பயணத்தை ஆத்மதிருப்தி நிறைந்த ஒன்றாக மாற்றியுள்ளது. நான் பெற்ற இந்த அனுபவத்தை அனைவரும், குறிப்பாக இளம் பெண்களும் பெற வேண்டும் என்பது என்னுடைய நோக்கம்.
எழுத்து: பா. ஹேமா
