மாணவர் முரசு
இ-பேப்பர்
உலகிலேயே ஆக அதிகமான போட்டித்தன்மை வாய்ந்தப் பொருளியல் எனும் நிலையை இழந்து, சிங்கப்பூர் ஐந்தாவது இடத்துக்கு இறங்கியிருக்கிறது.
எனினும், நிர்வாக மேம்பாட்டுக் கழகத்தின் (ஐஎம்டி) உலகப் போட்டித்தன்மை பட்டியலின்படி சிங்கப்பூர் ஆசியாவின் ஆக அதிகமாப் போட்டித்தன்மை வாய்ந்த பொருளியலாக அது குறிப்பிடப்பட்டுள்ளது.
நிர்வாக மேம்பாட்டுக் கழகம் சுவிட்சர்லாந்தையும் சிங்கப்பூரையும் தளமாகக் கொண்டிருக்கிறது.
பட்டியலின் முதல் நான்கு இடங்களை தற்போது ஐரோப்பிய நாடுகள் பிடித்துள்ளன. முதல் இடத்தில் சுவிட்சர்லாந்து உள்ளது. இரண்டாவது இடத்தில் சுவீடனும் மூன்றாம் நான்காம் இடங்களில் முறையே டென்மார்க்கும் நெதர்லாந்தும் உள்ளன.
போட்டித்தன்மையை மதிப்பிடும் அம்சங்களில் ஒன்றான பொருளியல் செயல்பாட்டில் சிங்கப்பூர் முதல் இடத்தில் வந்ததாக ஐஎம்டி கூறியது.
ஆனால் உலகளாவிய வர்த்தகச் செயல்திறனில் அது ஒன்பதாவது இடத்துக்கும் உலகளாவிய கட்டமைப்பில் 11வது இடத்துக்கும் சிங்கப்பூர் இறங்கியது.
வேலை இழப்பு, உற்பத்தித் திறன் குறைவு, ஆகியவற்றுடன் கொவிட்-19 பரவலின் பொருளியல் பாதிப்பு ஆகியவற்றால் சிங்கப்பூர் சிக்கல்களைச் சந்தித்ததாக ஐஎம்டி தெரிவித்தது.
பட்டியலில் கீழ் இறங்கிய மற்ற நாடுகளைப் போல, சிங்கப்பூரின் பொருளியல் நடவடிக்கைகள் குறைந்தன. வேலை வளர்ச்சி விகிதம் குறைந்ததுடன், அரசாங்கக் கடன், பொதுக் கடன் ஆகியவை அதிகரித்ததும் அது பட்டியலில் இறங்கியதற்குக் காரணங்களாகக் கூறப்பட்டன.
இருப்பினும் அனைத்துலக வர்த்தகம், தொழில்நுட்பக் கட்டமைப்பு ஆகிய அம்சங்களில் சிங்கப்பூர் முதல் இடத்தில் வந்தது. அனைத்துலக முதலீடு, வர்த்தகத் துறைச் சட்டங்கள் ஆகிய அம்சங்களிலும் அது சிறப்பாக செயல்பட்டது.
சிங்கப்பூரின் நிலவியல் கூறு அதற்கு சாதகமாக இல்லாததும் அது பட்டியலில் இறங்கியதற்கு ஒரு காரணம் என்றது ஐஎம்டி.
