சந்தைக் கடைக்காரர்கள், கடை உதவியாளர்களிடையே கிருமித் தொற்று கண்டுபிடிக்கப்பட்டதைத் தொடர்ந்து இங்குள்ள பல சந்தைகளிலும் உணவங்காடி நிலையங்களிலும் நேற்று கூட்டம் குறைந்து காணப்பட்டது.
சில சந்தைகள் தங்கள் வழக்கத்தின்படி திங்கட்கிழமை மூடியிருந்ததாக ஸ்ட்ரெய்ட்ஸ் டைம்ஸ் தெரிவித்தது. நேற்று திறந்திருந்த வேறு சில சந்தைகளில் மீன் மற்றும் கடலுணவு வகைகளை விற்கும் கடைகள் மூடப்பட்டிருந்தன.
உணவங்காடி நிலையங்களில் வாடிக்கையாளர்கள் பெரும்பாலும் தனியாக அல்லது இருவர் இருவராக அமர்ந்து சிலர் மட்டுமே உண்டனர்.
தேசிய சுற்றுப்புற வாரியத்தின் பாதுகாப்பு இடைவெளித் தூதர்கள் சில உணவங்காடி நிலையங்களில் காணப்பட்டனர்.
பெருந்தொற்றால் ஏற்கனவே வர்த்தகம் அடி வாங்கியுள்ளது. இப்போது கூட்டம் மேலும் குறைந்ததால் விற்பனையும் சரிந்துவிட்டதாக சந்தைகள், உணவங்காடி நிலையங்களில் கடை வைத்திருப்பவர்கள் கவலைப்பட்டனர்.
செங் சான் சந்தை, உணவங்காடி நிலையத்தில் கோழி, ஆட்டிறைச்சி விற்கும் திரு நூர் அப்துல் அஸீஸ், 74, நேற்று அதிகாலை 6 மணிக்குக் கடை திறந்ததார். ஆனால் , சொற்ப விற்பனை மட்டுமே நடைபெற்றதாகக் கூறினார்.
சில வாடிக்கையாளர்கள் சந்தைக்குச் செல்ல வேண்டாம் என்று தங்கள் பிள்ளைகள் கேட்டுக்கொண்டதாகவும் இணையத்தில் பொருட்களை வாங்கித் தருவதாககூறியதாகச் சொன்னார் வெஸ்ட் கோஸ்ட் சந்தை, உணவங்காடி நிலையத்தில் முட்டை கடை நடத்தும் திரு சியூ கியன் ஹூன், 55.
எனினும் இன்று ஹஜ்ஜுப் பெருநாள் என்பதால் சிலர் சந்தைக்குச் செல்வதைத் தவிர்க்கவில்லை. ஹவ்காங் வில்லேஜ் சந்தை மூடப்பட்டிருக்கும் என்ற பயத்தில் அங்கு சென்றார் திருவாட்டி நோய்லிஸா, 52. ஆனால் சந்தை திறந்திருந்ததால் அவருக்குத் தேவையான பொருட்கள் கிடைத்தன.
ஜூரோங் மீன்பிடித் துறை முகத்தில் கிருமிப் பரவல் ஏற்பட்டதைத் தொடர்ந்து, கடந்த வார இறுதியில் ஹோங் லிம், சொங் பூன் சந்தைகளில் தொற்றுக் குழுமங்கள் ஏற்பட்டதாக அறிவிக்கப்பட்டது. மேலும் 14 சந்தைகளில் கிருமித் தொற்று ஏற்பட்டுள்ளது.
அவற்றில் ஹேக் ரோடு சந்தை மற்றும் உணவங்காடி நிலையம், ஜூரோங் சென்ட்ரல் பிளாஸா, ஷுன்ஃபூ மார்ட் குறித்து கடந்த ஞாயிற்றுக்கிழமை இரவு சுகாதார அமைச்சு அறிவித்தது. சந்தை களைத் தவிர்த்து மேலும் 3 கேடிவி கூடங்களில் தொற்று கண்டறியப்பட்டதாகவும் அது கூறியது. நிலைமையை அணுக்கமாகக் கண்காணித்து விரைந்து நடவடிக்கை எடுத்து வருவதாக அது கூறியது.
நேற்று மாலை நிலவரப்படி தொற்று ஏற்பட்ட சந்தைகளின் விவரம்:
ஹோங் லிம் சந்தை, உணவங்காடி நிலையம், சொங் பூன் சந்தை, உணவங்காடி நிலையம், அமோய் ஸ்திரீட் உணவு நிலையம் சொங் பாங் சந்தை, உணவங்காடி நிலையம், வாம்போ ஈரச்சந்தை, தெலுக் பிளாங்கா கிரசென்ட், தாமான் ஜூரோங் சந்தை, ரெட்ஹில் சந்தை, கேலாங் சிராய் மலாய் சந்தை கேலாங் பாரு சந்தை, அங் மோ கியோ புளோக் 527 சந்தை, வெஸ்ட் கோஸ்ட் புளோக் 726 ஈரச்சந்தை, புக்கிட் தீமா ஈரச்சந்தை, ஹேக் ரோடு சந்தை, உணவங்காடி நிலையம், ஜூரோங் சென்ட்ரல் பிளாஸா, ஷுன்ஃபூ மார்ட்.