மாணவர் முரசு
இ-பேப்பர்
காப்புறுதி நிறுவனங்கள் பல்வேறு வர்த்தக முறைகளைப் பயன்படுத்தி வாடிக்கையாளர்களை ஈர்த்துவரும் நிலையில், 'என்டியுசி இன்கம்' மக்களுக்கு நன்கு பரிச்சயமான ஓர் உத்தியைப் பயன்படுத்தியுள்ளது.
'நெட்ஃபிளிக்ஸ்' சேவையைப் பயன்படுத்திப் படங்கள், தொடர்கள் ஆகியவற்றை நாடும் வாடிக்கையாளர்கள், மாதம் தலா 10 வெள்ளி சந்தா செலுத்துவர். அந்தத் திட்டத்தில் அவர்கள் எந்நேரத்திலும் மாற்றம் செய்யும் வசதியும் உண்டு. அதே வர்த்தக முறையை காப்புறுதி நிறுவனம், 'ட்ரைப்' என்ற சேவையை வழங்கப் பயன்படுத்துகிறது.
சிங்கப்பூரிலேயே இத்தகைய சந்தா திட்டம் அடிப்படையில் வாடிக்கையாளர் தேவைக்கு ஏற்ப மாற்றம் செய்யும் முதல் காப்புறுதித் திட்டத்தை நிறுவனம் வடிவமைத்துள்ளது.
ஐந்தே வெள்ளியை மாதச் சந்தாவாக செலுத்தும் திட்டத்தின் கீழ் வெவ்வேறு அம்சங்களிலிருந்து வாடிக்கையாளர்கள் தங்களின் மாறிவரும் நிதித் தேவை அடிப்படையில் தேர்ந்தெடுத்துக்கொள்ளலாம்.
தற்காலிக வேலையில் உள்ளவர்கள், புதிதாக பெற்றோர் ஆனவர்கள், தங்களின் முதல் வேலையில் சேர்ந்தவர்கள் போன்றோருக்கு இதுபோன்ற திட்டம் பேருதவியாக இருக்கும் என்றார் நிறுவனத்தின் தலைமை மின்னிலக்க அதிகாரி பீட்டர் டே.
ஒரு சில காப்புறுதித் திட்டங்களின்கீழ் வாடிக்கையாளருக்குத் தேவைப்படாத அம்சங்கள் இருக்கக்கூடும் என்று குறிப்பிட்ட அவர், இதுபோன்ற திட்டத்தை வழங்குவதால் வாடிக்கையாளர் தம் விருப்பத்திற்கு ஏற்ற அம்சங்களைத் தேர்ந்தெடுத்துத் திருப்தியடைய முடிவதாகக் கூறினார்.
வாடிக்கையாளருக்கு மட்டுமன்றி அவரின் குடும்பச் சூழலுக்கு ஏற்ப இத்தகைய சந்தா முறை அமைந்திடும் என்றும் திரு டே விளக்கினார்.
சந்தா அடிப்படையிலான வர்த்தகங்கள் பாரம்பரிய முறையில் செயல்படும் வர்த்தகங்களைக் காட்டிலும் ஐந்திலிருந்து எட்டு மடங்கு வேகமாக வளர்ச்சி கண்டுள்ளன என்ற தகவலையும் அவர் பகிர்ந்துகொண்டார்.
