மாணவர் முரசு
இ-பேப்பர்
உட்லண்ட்ஸ் வட்டாரத்தில் புதிய சமூக மளிகைக் கடை ஒன்று திறக்கப்பட்டுள்ளது.
ஸ்டோர்@உட்லண்ட்ஸ் எனப் பெயரிடப்பட்டுள்ள அந்தச் சமூக மளிகைக் கடைக்கு இதுவரை 120 குடியிருப்பாளர்கள் சென்றுள்ளனர்.
அந்த மளிகைக் கடை புளோக் 852 உட்லண்ட்ஸ் ஸ்திரீட் 83ல் உள்ளது.
குறைந்த வருமானக் குடியிருப்பாளர்களுக்கு உதவ இந்த மளிகைக் கடை திறக்கப்பட்டுள்ளது.
மக்கள் செயல் கட்சி சமூக அறநிறுவனத்தின் உட்லண்ட்ஸ் கிளை, உட்லண்ட்ஸ் குடியிருப்பாளர்கள் ஆலோசனைக் குழு ஆகியவற்றின் கூட்டு முயற்சியின்கீழ் ஒவ்வொரு மாதமும் அதிகபட்சம் ஒன்பது மளிகைப் பொருட்களைக் குறைந்த வருமானக் குடியிருப்பாளர்கள் தேர்ந்தெடுத்து இலவசமாக பெற்றுக்கொள்ளலாம். 150க்கும் மேற்பட்ட குறைந்த வருமானக் குடும்பங்களுக்கு உதவுவதே புதிய சமூக மளிகைக் கடையின் இலக்கு என்று செம்பவாங் குழுத் தொகுதி நாடாளுமன்ற உறுப்பினர் மரியாம் ஜஃபார் தெரிவித்தார்.
சமூக மளிகைக் கடைக்கு நேற்று சென்றிருந்த திருவாட்டி மரியாம், செய்தியாளர்களிடம் இதுகுறித்து பேசினார்.
"பல்வேறு பங்காளிகள் வழங்கிய நன்கொடையைப் பயன்படுத்தி கடந்த பல ஆண்டுகளாக வசதி குறைந்த குடியிருப்பாளர்களுக்கு நாங்கள் உணவுப் பொருட்களை விநியோகித்தோம்.
"ஆனால் வழங்கப்பட்ட சில உணவுப் பொருட்கள் தங்களுக்கு ஏற்புடையதல்ல என்று குடியிருப்பாளர்களில் சிலர் தெரிவித்தனர். உடல்நலம் காரணமாக அல்லது தனிப்பட்ட விருப்பத்தால் அவர்களால் விநியோகிக்கப்பட்ட உணவுப் பொருட்களைச் சாப்பிட முடியாமல் போனது. குடியிருப்பாளர்களின் வீடுகளுக்குச் செல்லும்போது பயன்படுத்தப்படாத உணவுப் பெருட்கள் இருப்பதை நாங்கள் கண்டோம். காலாவதியான உணவுப் பொருட்கள் குவிந்துகிடப்பதையும் பார்த்தோம்.
"அதனால்தான் தங்களுக்குத் தேவையான உணவுப் பொருட்களைக் குடியிருப்பாளர்கள் தேர்ந்தெடுக்கும் அணுகுமுறையை நாங்கள் தொடங்கியுள்ளோம். சமூக மளிகைக் கடையில் உள்ள பொருட்களில் தங்களுக்கு வேண்டிய, பிடித்தமான பொருட்களை அவர்கள் தேர்ந்தெடுக்கலாம். ஆரோக்கியமான உணவுப் பொருட்களைக் கொண்டு சமைக்கலாம்," என்று திருவாட்டி மரியாம் தெரிவித்தார்.
சமூகத்திடமிருந்தும் பிரைம் பேரங்காடி, லியோங் ஹப் போன்ற ஆதரவாளர்களிடமிருந்தும் கிடைத்த நன்கொடையைப் பயன்
படுத்தி கடந்த மாதத்திலிருந்து புதிய சமூக மளிகைக் கடையில் 3,000க்கும் மேற்பட்ட மளிகைப் பொருட்கள் அடுக்கி வைக்கப்பட்டுள்ளதாக திருவாட்டி மரியாம் கூறினார்.
"எதிர்காலத்தில் இந்தச் சமூக மளிகைக் கடை சமூக இடமாக மாற வேண்டும் என விரும்புகிறோம்.
"குடியிருப்பாளர்களிடம் ஆரோக்கியமான உணவுவகைகளை அறிமுகப்படுத்த சமையல் நிகழ்ச்சிகளை நடத்த விரும்புகிறோம். இருக்கும் பணத்தை வைத்துக்கொண்டு கடைகளில் பொருட்களை வாங்கும் திறனைப் பிள்ளைகளுக்குக் கற்பிக்கும் நிகழ்ச்சி களுக்கு ஏற்பாடு செய்யத் திட்டமிட்டுள்ளோம்," என்றார் அவர்.
