மாணவர் முரசு
இ-பேப்பர்
சிங்கப்பூரில் மரபணு குறைபாடு தினம் நேற்று கடைப்பிடிக்கப்பட்டது. அந்த நிகழ்ச்சி இரண்டாவது முறையாக இந்த ஆண்டும் நேரடியாகவும் இணையம் மூலமாகவும் நடந்தது.
ஃபேஸ்புக் மூலம் நேரடியாக ஒளிபரப்பப்பட்ட ஒரு நிகழ்ச்சியில் சமுதாய, குடும்ப மேம்பாட்டு அமைச்சர் மசகோஸ் ஸுல்கிஃப்லி கலந்துகொண்டார்.
இந்த நிகழ்ச்சியை தொழில்நுட்பக் கல்விக் கழக மாணவியான குமாரி கிரேஸ் கான் இணைந்து நடத்தினார். சிங்கப்பூர் எல்லாரையும் உள்ளடக்கிய, பரிவுமிக்க சமுதாயத்தைப் பலப்படுத்த முயல்வதாக அந்த நிகழ்ச்சியில் பேசிய அமைச்சர் குறிப்பிட்டார்.
"உடற்குறை உள்ளவர்கள் அனைவரும் அன்றாட வாழ்வில் அனைத்துத் துறைகளிலும் பொருள்பொதிந்த முறைகளில் ஈடுபட்டு மகிழ வேண்டும் என்று விரும்பு கிறோம்," என்றார் அமைச்சர்.
எல்லாரையும் உள்ளடக்கிய சமூகத்தை உருவாக்குவதில் ஒவ்வொருவருக்கும் பங்கு உண்டு என்று அமைச்சர் வலியுறுத்தினார்.
அந்த நிகழ்ச்சியையொட்டி 'ராக் யுவர் சாக்ஸ்' என்ற ஓர் இயக்கமும் இடம்பெற்றது. மரபணு குறைபாடு பற்றிய புரிந்துணர்வை மேம்படுத்துவது அந்த இயக்கத்தின் நோக்கம்.
அந்த இயக்கத்தில் பங்கெடுப்பவர்கள், பொருத்தமில்லாத பல வண்ணங்களிலான கால் உறைகளை அணிந்துகொள்வார்கள்.
இது மரபணு குறைபாட்டை எடுத்துக்காட்டுவதாக இருக்கும்.
இந்த உறைகளை மரபணு குறைபாட்டுச் சங்கம் $20 வெள்ளிக்கு விற்கிறது.
இதன் மூலம் கிடைக்கும் தொகை, இந்தச் சங்கம் செயல்படுத்தும் மூன்று செயல்திட்டங்களுக்கு ஆதரவு அளிக்கிறது.
உலக மரபணு குறைபாடு தினம் ஒவ்வோர் ஆண்டும் மார்ச் 21ஆம் தேதி கடைப்பிடிக்கப்படுகிறது.
மனித உடலில் ஒவ்வோர் உயிரணுவிலும் 23 ஜோடி மரபணுக்கள் இருக்கும். 21வது ஜோடியில் இரண்டு குரோமோசோம்களுக்கு மேலாக மேலும் ஒரு குரோமோசோம் சேர்ந்துவிடுவதுண்டு. இதனால் மரபணு குறைபாடு ஏற்படுகிறது.
இத்தகைய குறைபாடு உள்ளவர்களுக்குப் பல விதமான உடல், மன நலிவும் தோற்றத்தில் பல வேறுபாடுகளும் இருக்கும்.
சிங்கப்பூரில் இத்தகைய குறைபாடுடன் கூடிய பலரையும் உள்ளடக்கிய நடனக் குழு ஒன்று இருக்கிறது. 'பல திறன் நடனக்குழு' என்று குறிப்பிடப்படும் அந்தக் குழுவில் திருவாட்டி ஜுன் லின், 37, என்ற நடனப் பிரியரும் இருக்கிறார்.
இவர் நேற்று உலக மரபணு குறைபாடு தினத்தைக் குறிக்கும் வகையில் நடந்த ஒரு நிகழ்ச்சியில் பேசினார்.
மரபணு குறைபாடு இருந்தாலும் மற்றவர்களைப் போலவே அனைத்திலும் வெகுசிறப்பாக ஈடுபட்டு வழக்கமான வாழ்வை மேற்கொள்ள முடியும் என்று இவர் தெரிவித்தார்.
திருவாட்டி லின் மரபணு குறைபாட்டுச் சங்கம் விற்பனை செய்யும் காலுறைகளை வடிவமைத்து உதவி இருக்கிறார்.
