தொழில்நுட்பக் கல்விக் கழகமும் இளம் உணவுக்கடைத் தொழில்முனைவோர் பயிற்சித் திட்டத்தின்கீழ் செயல்படும் 'ஃபுட் ரிபப்ளிக்' உணவங்காடியும் இணைந்து உணவுக்கடை நடத்த விரும்பும் இளையர்களை ஊக்குவிக்கும் திட்டத்தைத் தொடங்கியுள்ளன.
ஆர்ச்சர்ட் வட்டாரத்தில் அமைந்திருக்கும் 'ஷா சென்டர்' வளாகத்தில் உள்ளது 'ஃபுட் ரிபப்ளிக்' உணவங்காடி.
இதில் மேற்கத்திய உணவு வகைகளை விற்பனை செய்யும் கடையை நடத்த 'ஐடிஇ காலேஜ் வெஸ்ட்' மாணவர்கள் ஏழு பேருக்கு (படம்) வாய்ப்பு கிடைத்து உள்ளது.
நவம்பர் மாதம் இவர்களின் கடை வாடிக்கையாளர்களுக்கு சேவையைத் தொடங்கும்.
இந்த மாணவர்கள் நடத்தும் உணவுக்கடைக்கான வாடகையைச் செலுத்துவதற்கு, இளம் உணவுக்கடைத் தொழில்முனைவோர் பயிற்சித் திட்டத்தின்கீழ் மானியம் வழங்கப்படுகிறது.
இந்தக் கடையில் விற்கப்படும் உணவு வகைகள் 15 வெள்ளிக்குக் கீழ் இருக்கும் என்று கூறப்பட்டது.
தொழில்நுட்பக் கல்விக் கழக ஆசிரியர்கள், மேற்கத்திய உணவு வகைகளில், ஆசியப் பாரம்பரியம், குறிப்பாக சிங்கப்பூர் உணவுப் பாரம்பரியத்தைப் பின்பற்றும் செய்முறையைப் புகுத்த மாணவர்களுக்கு உதவுவார்கள்.
சமையற்கலை வகுப்பில் பயிலும் எஞ்சிய 33 மாணவர்கள், பல்வேறு உணவகங்கள், ஹோட்டல்கள் ஆகியவற்றில் தொழில்முறைப் பயிற்சி பெறுவர் என்று கூறப்பட்டது.
ஆறு மாத காலம் நீடிக்கும் இந்தத் தொழில்முறைப் பயிற்சியின்போது மாணவர்கள் வேலைச்சூழலில் தங்களது புத்தாக்கச் சிந்தனைகளையும் திறன்களையும் சோதித்துப் பார்ப்பதற்கான வாய்ப்பு கிடைக்கும்.
இந்த அனுபவங்களை மாணவர்கள் தங்கள் கல்வி சார்ந்த ஒப்படைப்புத் திட்டங்களுக்குப் பயன்படுத்திக்கொள்ளலாம் என்பது இந்தத் திட்டத்தின் சிறப்பு.