மாணவர் முரசு
இ-பேப்பர்
அனுஷா செல்வமணி
பல்கலைக்கழகத்தில் மாணவப் பரிமாற்றுத் திட்டத்தின்கீழ் ஆஸ்திரேலியாவின் கெய்ன்ஸ் நகரத்திற்குச் சென்ற ஜீவிதா சஜீவ் பிள்ளை, 30, ஆப்பிரிக்க கலாசாரத் தில் ஆர்வம் ஏற்பட்டது. ஆப்பிரிக்க நாட்டு மாணவர்களுடன் நண்பர்களாகி அவர்களுடன் ஆப்பிரிக்கப் பாடல்களுக்கு ஆடுவதும் அவர்கள் சமைத்த பாரம்பரிய உணவைச் சுவைப்பதுமாக ஜீவிதா இருந்தார்.
நான்கு வயதிலிருந்தே பரதநாட்டியம், 'பெலே', 'ஹிப்ஹாப்', 'ஸும்பா' நடன வகைகளைப் பயின்று வந்த ஜீவிதா, ஆஸ்திரேலியாவிலிருந்து சிங்கப்பூர் திரும்பியதும் ஆப்பிரிக்க நடனத்தையும் கற்கத் தொடங்கினார்.
செனகலிலிருந்து வந்தவர்வழி ஆப்பிரிக்க நடனத்தைக் கற்றதுடன் ஆப்பிரிக்க நடனக் காணொளிகளை இணையத்தில் நாடினார். பல்கலைக்கழகத்தில் உளவியல் பயின்ற ஜீவிதா, பகுதிநேர வேலையாக 'ஸும்பா' நடனத்தைக் கற்பித்திருந்ததால், தோழியின் ஊக்குவிப்பில் ஆப்பிரிக்க நடனத்தையும் மற்றவர்களுக்குக் கற்றுக்கொடுக்கத் தொடங்கினார்.
முழுநேரமாக 'ஆஃப்ரோவித்ஜீவி' (Afrowithjeevi) எனும் ஆப்பிரிக்க நடன உடலுறுதி வகுப்பை 2020ல் துவங்கினார். தொடக்கத்தில் மக்களிடம் விளம்பரப்படுத்துவது குறித்தும் மக்களின் ஆதரவு எவ்வளவு தூரம் இருக்கும் என்பது பற்றியும் அவருக்கு ஐயங்கள் இருந்தன.
"பெற்றோரின் ஊக்குவிப்பு, நெருங்கிய நண்பர்களின் ஆதரவு, வணிகப் பயிலரங்குகள் ஆகியவையே 'ஆஃப்ரோவித்ஜீவி' தற்போது அடைந்துள்ள வெற்றிக்குக் காரணங்கள்," என்றார் ஜீவிதா.
வாரத்தில் எட்டு வகுப்புகள் வரை நடத்திவரும் ஜீவிதா, ஏறக் குறைய 40 பேருக்கு ஆப்பிரிக்க நடனத்தைக் கற்றுத் தருகிறார்.
"வகுப்புகளில் ஜீவிதா தொடர்ந்து ஊக்கமளிப்பதால், நான் ஆடத் தயங்குவதில்லை," என்று 'ஃபிளிப்டு டிசைன்' நிறுவனரான மியெல் தாரா வாசுதேவன், 23, கூறினார்.
ஆப்பிரிக்க கலாசாரத்தைப் பற்றி ஆழமாக அறிந்திட அடுத்த மாதம் முதல் ஜனவரி வரை ஜீவிதா ஆப்பிரிக்கக் கண்டத்திற்குப் பயணம் மேற்கொள்ளவிருக்கிறார்.
தான்சானியா, போட்ஸ்வானா ஆகிய நாடுகளின் நடனங்களைக் கற்றுக்கொண்டு சிங்கப்பூரில் தன் மாணவர்களுக்குக் கற்பிக்க வேண்டுமென்பது இவரின் தற்போதைய இலக்கு. ஆப்பிரிக்க நண்பர்களைச் சந்திப்பதோடு அங்குள்ள நடனக் கலைஞர்களுடன் வணிகப் பங்காளித்துவத்தை ஏற்படுத்தவும் ஜீவிதா திட்டமிட்டுள்ளார்.
