உயர்நிலை 1ல் பயின்றபோது சேண்டி (உண்மைப் பெயரன்று) தன்னையே காயப்படுத்திக்கொள்ளத் தொடங்கினார். அந்தத் தழும்புகளை ஆசிரியர் ஒருவர் கண்டபின் அவர் பள்ளி ஆலோசகரிடம் பரிந்துரைக்கப்பட்டார்.
ரகசியம் காப்பதாக உறுதிகூறியபின், சேண்டி தன்னுடைய எண்ணங்களை அந்த ஆலோசகரிடம் பகிர்ந்துகொண்டார். ஆயினும், சேண்டி கூறியவற்றை அவரின் பெற்றோரிடம் அந்த ஆலோசகர் பகிர்ந்துகொண்டார்.
அதனையடுத்து, தங்கள் மகள் மனநலக் கழகத்தின் உதவியை நாடினால் அது நிரந்தரமாக ஆவணத்தில் பதிவாகிவிடும் என்று கவலைப்பட்ட அவரின் பெற்றோர், அவருக்குத் தேவைப்பட்ட உதவியை நாட அனுமதிக்கவில்லை.
ஆறாண்டுகளுக்குப் பின், கடந்த 2019ஆம் ஆண்டு தமது 19வது வயதில் சேண்டி தமது உயிரை மாய்த்துக்கொள்ளத் திட்டமிட்டார். அதுபற்றித் தம் தோழியிடமும் அவர் பகிர்ந்துகொண்டார்.
அந்தத் தோழி, அவரை ‘லிமிட்லெஸ்’ எனும் லாபநோக்கமற்ற அமைப்பிடம் பரிந்துரைத்தார். அவ்வமைப்பு 12 முதல் 25 வயதிற்கு உட்பட்டோருக்கு மனநல சேவைகளை வழங்கி வருகிறது.
அவ்வமைப்பிடமிருந்து ஆலோசனை பெற்ற சேண்டி, இப்போது உயிரை மாய்த்துக்கொள்வது குறித்து எண்ணுவதில்லை. இப்போது அவர் உளவியலில் பட்டம் பயின்று வருகிறார்.
தங்கள் பெற்றோர் தங்களைப் புரிந்துகொள்ளாமல் போகலாம் என்றும் உண்மை தெரிந்தால் அவர்கள் மோசமாக எதிர்வினையாற்றலாம் என்றும் அஞ்சி, இளையர்கள் உதவிகோரத் தயங்குவதாக ஸ்ட்ரெய்ட்ஸ் டைம்ஸ் நாளிதழிடம் பேசிய சமூகப் பணியாளர்கள் தெரிவித்தனர்.
சமூக சேவை அமைப்புகளிடம் இருந்து மனநல சேவைகள் பெறும் 18 வயதிற்குக் குறைவானவர்கள் வேறிடங்களில் மற்ற சிகிச்சைக்குப் பரிந்துரைக்கப்பட பெற்றோரின் ஒப்புதல் பெற வேண்டும் என்று அவர்கள் கூறினர்.
மனநல ஆலோசனை அல்லது சிகிச்சை நாடுவது இளையர்களிடத்தில் குறைவாக உள்ளது என்றார் ‘லிமிட்லெஸ்’ அமைப்பின் நிறுவனர் ஏஷெர் லோ.
பயனாளர்கள் தங்களைப் பற்றிய பெயர் உள்ளிட்ட விவரங்களைத் தெரிவிக்காமலேயே ஆலோசகர்களிடம் பேச ‘டிஸ்கார்ட்’ தளத்தில் ஒரு சேவையகத்தை ‘லிமிட்லெஸ்’ நடத்தி வருகிறது. இளையர்கள் உரையாடுவதற்கான அனைத்துலக சமூகத் தளமாக ‘டிஸ்கார்ட்’ விளங்கி வருகிறது.
‘சேஃப்ஹவுஸ்’ எனும் அந்த சேவையகத்தில் 13 வயதும் அதற்கும் மேற்பட்ட குழந்தைகள் தங்களது எண்ணங்களைச் செவிமடுக்கச் செய்யலாம்.
கடந்த 2021ஆம் ஆண்டு 928 இளையர்கள் மனநல உதவி, ஆலோசனைக்காக ‘லிமிட்லெஸ்’ அமைப்பை நாடினர். அதற்கு முந்திய ஆண்டில் இந்த எண்ணிக்கை 373ஆக இருந்தது. ‘லிமிட்லெஸ்’ அமைப்பின் ‘டிஸ்கார்ட்’ தளத்தில் 664 பேர் உறுப்பினர்களாக இருக்கின்றனர்.
‘ஐயேம் ஃபிரண்ட்லி கோ’ எனும் இளையர்கள் குழு, 16 முதல் 35 வயதிற்குட்பட்டவர்கள் தங்களது பெயரை வெளியிடாமல் ஆலோசனை நாடுவதற்கென ஓர் இணையத்தளத்தை (https://www.imfriendlyco.com) நடத்தி வருகிறது.
அந்த இணையத்தளத்தை நாடுவோர், பயிற்சி பெற்ற சக ஆதரவாளருடன் உரையாடுமுன் ஒரு புனைப்பெயரைத் தெரிவுசெய்துகொள்ள வேண்டும். உளவியல் வல்லுநர்கள், ஆலோசகர்களின் ஆலோசனைப்படி வடிவமைக்கப்பட்ட ஒரு பாடத்திட்டத்தின்கீழ் பயிற்சி பெற்ற பிறகு தொண்டூழியர்கள் அத்தகைய ஆதரவாளர்களாகச் செயல்பட முடியும்.