மாணவர் முரசு
இ-பேப்பர்
சிங்கப்பூர் பொருளியலின் வளர்ச்சி கண்ணோட்டம் அதிக சவால்மிக்கதாக உருவெடுத்தாலும் குறிப்பிடத்தக்க பொருளியல் வீழ்ச்சி சாத்தியமில்லை என்று வர்த்தக தொழில் அமைச்சு நேற்று தெரிவித்தது. இவ்வாண்டின் பொருளியல் வளர்ச்சி 0.5%க்கும் 2.5%க்கும் இடைப்பட்டிருக்கும் என்றும் அது கூறியது.
“இந்த ஆண்டு பொருளியல் மந்தநிலையை நாங்கள் எதிர்பார்க்கவில்லை. ஆனால், காலாண்டு அடிப்படையில் அவ்வப்போது மெதுவான வளர்ச்சி ஏற்பட வாய்ப்புண்டு,” என்று வர்த்தக தொழில் அமைச்சின் தலைமை பொருளியல் நிபுணர் யோங் யிக் வெய் கூறியுள்ளார்.
முதலாம் காலாண்டு வளர்ச்சி விகிதத்தையும் அமைச்சு நேற்று திருத்தி அமைத்தது. இவ்வாண்டின் முதல் மூன்று மாதங்களில் பொருளியல் ஆண்டு அடிப்படையில் 0.4% வளர்ச்சி கண்டது. ஆனால், ஏப்ரலில் புளூம்பர்க் வெளியிட்ட வளர்ச்சி முன்னுரைப்பான 0.1%விட இது அதிகம். முன்னைய காலாண்டின் வளர்ச்சி 2.1% ஆக இருந்தது.
பருவத்துக்கு ஏற்றவாறு திருத்தியமைக்கப்பட்ட காலாண்டு பொருளியல் வளர்ச்சி 0.4% சரிந்தது. 2022 கடைசி காலாண்டில் வளர்ச்சி 0.1% அதிகரித்திருந்தது.
இதற்கிடையே, எண்டர்பிரைஸ் சிங்கப்பூர் அமைப்பும் எண்ணெய் சாரா ஏற்றுமதிக்கான வளர்ச்சி முன்னுரைப்பை நேற்று குறைத்தது.
எண்ணெய் சாரா ஏற்றுமதியும் சரக்கு வர்த்தகமும் முதலாம் காலாண்டில் சரிவைக் கண்டன. ஆண்டு அடிப்படையில் எண்ணெய் சாரா ஏற்றுமதி 16.2%ம், சரக்கு வர்த்தகம் 7.8%ம் குறைந்தன.
முதலாம் காலாண்டில் சிங்கப்பூரின் உற்பத்தித் துறை ஆண்டு அடிப்படையில் 5.6% சரிந்தது. ஒப்புநோக்க முன்னைய காலாண்டில் அது 2.6% சரிவாக இருந்தது.
போக்குவரத்துப் பொறியியல் துறை தவிர, மற்ற எல்லாத் துறைகளிலும் உற்பத்தி குறைந்தது.
ஹோட்டல் துறை, முன்னைய காலாண்டின் வளர்ச்சியான 7.8%யை கடந்து, முதலாம் காலாண்டில் 21.9%க்கு வளர்ச்சி கண்டது.
2022ஐ காட்டிலும் அனைத்துலக சுற்றுப்பயணிகள் வருகையின் வலுவான மீட்சியே இந்த வளர்ச்சிக்கு முக்கிய காரணம் என்று அமைச்சு குறிப்பிட்டது.
உணவு, பானத்துறை சேவைத் துறையும் ஆண்டு அடிப்படையில் 12.2% வளர்ச்சி கண்டது. உணவுத் தயாரிப்பாளர்கள், உணவகங்கள் ஆகியவற்றில் தென்பட்ட அதிக அளவிலான விற்பனை இதற்குக் காரணமாக அமைந்தது என்றும் நேற்று தெரிவிக்கப்பட்டது.
