குவாந்தான்: ஆசிய வெற்றியாளர் விருது ஹாக்கிப் போட்டியில் மலேசியா தென்கொரியாவை வென்று வெண்கலப் பதக்கத்தைத் தட்டிச் சென்றுள்ளது. இதில் வழக்கமான போட்டி நேரத்தில் இரு அணிகளும் தலா ஒரு கோல் போட்டு ஆட்டம் 1-1 என சமநிலையில் இருந்தது. இந்த ஆட்டத்தில் மலேசியாவுக்கான கோலை ஷாஹ்ரில் சாபாவும் தென்கொரியாவுக்கான கோலை அந்த அணியின் தலைவர் ஜுங் மன்ஜேயும் போட்டது குறிப்பிடத்தக்கது.
பின்னர், இரு அணிகளுக்கும் வழங்கப்பட்ட பெனால்டி வாய்ப்புகளில் மலேசியா மூன்று பெனால்டி வாய்ப்புகளை கோல்களாக மாற்றியது. இதற்கு நேர்மாறாக, தென்கொரியா தான் எடுத்த நான்கு பெனால்டி வாய்ப்புகளில் மூன்றை கோல்களாக்கத் தவறி தோல்வியைத் தழுவியது. இதைத் தொடர்ந்து மலேசிய அணி வெண்கலப் பதக்கத்தை வென்றது.