மாணவர் முரசு
இ-பேப்பர்
லண்டன்: லிவர்பூல் காற்பந்துக் குழு சகாப்தம் கென்னி டேல்கிலிஷுக்கு (படம்) கொரோனா கிருமித்தொற்று உறுதிசெய்யப்பட்டிருப்பதாக அவரது குடும்பத்தினர் தெரிவித்துள்ளனர். எனினும், அவருக்கு எந்த அறிகுறியும் தென்படவில்லை.
ஸ்காட்லாந்து நாட்டவரான 69 வயது டேல்கிலிஷ், தொற்றுநோய் ஏற்பட்டிருப்பதன் சந்தேகத்தின் பேரில் கடந்த புதன்கிழமை மருத்துவமனையில் அனுமதிக்கப்பட்டார்.
“அவருக்கு கொரோனா கிருமித்தொற்றுக்கான பரிசோதனை செய்யப்பட்டதைத் தொடர்ந்து கிருமித்தொற்று ஏற்பட்டிருப்பது உறுதிசெய்யப்பட்டது,” என்று டேல்கிலிஷ் குடும்பத்தினர் நேற்று முன்தினம் வெளிட்ட அறிக்கை ஒன்றில் குறிப்பிட்டனர்.
மருத்துவமனையில் அனுமதிக்கப்படுவதற்கு முன்னதாகவே குறிப்பிட்ட காலத்திற்கு டேல்கிலிஷ் சுயமாக தம்மைத் தனிமைப்படுத்திக்கொண்டதாக அவரது குடும்பத்தினர் தெரிவித்தனர்.
அரசாங்கம், நிபுணர்களின் வழிகாட்டுதலைப் பின்பற்றி நடக்குமாறு அனைவரையும் டேல்கிலிஷ் வலியுறுத்தியதாக அவரது குடும்பத்தினர் கூறினர்.
ஸ்காட்லாந்து குழுவான செல்டிக்கில் விளையாடிய டேல்கிலிஷ், நான்கு முறை அக்குழு ஸ்காட்டிஷ் லீக் கிண்ணத்தை வெல்ல முக்கிய பங்காற்றினார். 1977ஆம் ஆண்டில் லிவர்பூல் குழுவில் இணைந்தார்.
லிவர்பூலுக்காக அவர் விளையாடிய 13 ஆண்டு காலகட்டத்தில் எட்டு முறை இங்கிலிஷ் பிரிமியர் லீக் கிண்ணம், மூன்று முறை எஃப்ஏ கிண்ணம், மூன்று முறை ஐரோப்பிய கிண்ணம் ஆகியவற்றை வென்றார்.
