மாணவர் முரசு
இ-பேப்பர்
கடந்த ஈராண்டுகளுக்கும் மேலாக கொவிட்-19 கிருமிப் பரவல் உலகை ஆட்டிப்படைத்த நிலையில், அதன் பிடியிலிருந்து தப்பிக்க பல நாடுகளும் தங்கள் மக்களுக்குத் தடுப்பூசிகளையும் கூடுதல் தடுப்பூசிகளையும் போட்டுள்ளன.
இதனையடுத்து, பல நாடுகளும் கொவிட்-19 பரவலைத் தடுக்கும் நோக்கில் விதிக்கப்பட்டிருந்த கட்டுப்பாடுகளை அகற்றி வருகின்றன. ஆனாலும், முகக்கவசம் அணியும் நடைமுறை தொடர்கிறது. இந்த நிலையில், ஆசிய நாடுகளில் எத்தகைய முகக்கவச விதிமுறைகள் நடப்பிலுள்ளன என்பதைப் பார்க்கலாம்.
சீனா: பொதுப் போக்குவரத்து, கடைத்தொகுதிகள், உடற்பயிற்சிக்கூடங்கள் உள்ளிட்ட பொது இடங்களில் கட்டாயம் முகக்கவசம் அணிய வேண்டும்.
இந்தியா: பல மாநிலங்களிலும் சந்தைகள், மருத்துவமனைகள் போன்ற இடங்களிலும் பொதுப் போக்குவரத்தில் பயணம் செய்யும்போது முகக்கவசம் அணிந்திருப்பது கட்டாயம். ஆனாலும், கடந்த மாதத்தில் இருந்ததைப்போல அதிகாரிகள் இப்போது இவ்விதியைக் கண்டிப்பாக நடைமுறைப்படுத்துவதோ, அபராதம் விதிப்பதோ இல்லை.
இந்தோனீசியா: கொவிட்-19 பரவல் மீண்டும் அதிகரித்ததை அடுத்து, ஜூலை 1 முதல் கட்டாயமாக முகக்கவசம் அணிவது மீண்டும் நடப்பிற்கு வந்துள்ளது.
ஜப்பான்: பொதுப் போக்குவரத்து போன்ற கூட்டமான இடங்களில் முகக்கவசம் அணிவது கட்டாயம். வெளிப்புறங்களில் அதனை அகற்றிக்கொள்ளலாம்.
மலேசியா: உட்புறங்களில் கட்டாயமாக முகக்கவசம் அணிய வேண்டும்; வெளிப்புறங்களில் அவரவரது விருப்பம்.
தென்கொரியா: உட்புறங்களிலும் பொதுப் போக்குவரத்திலும் முகக்கவசம் அணிவது கட்டாயம். வெளிப்புறங்களில் அவசியமில்லை என்றபோதும் அவ்வழக்கம் நீடிக்கிறது.
தைவான்: வீட்டைவிட்டு வெளியில் வந்தாலே முகக்கவசம் அணிந்திருக்க வேண்டும். ஆயினும், உடற்பயிற்சியின்போது அல்லது வெளிப்புற நடவடிக்கைகளின்போது அதனை அகற்றிக்கொள்ளலாம். வெளிப்புறங்களில் சமூக இடைவெளிவிட்டு வேலை செய்தால் முகக்கவசம் கட்டாயமன்று.
தாய்லாந்து: கடந்த ஜூன் மாதத்திலிருந்து உட்புறங்களிலும் வெளிப்புறங்களிலும் கட்டாய முகக்கவச நடைமுறை அகற்றப்பட்டுவிட்டது. ஆனாலும், கூட்டமான அல்லது சமூக இடைவெளிக்கு வாய்ப்பில்லாத அல்லது காற்றோட்டம் குறைவான இடங்களில் முகக்கவசம் அணியும்படி அதிகாரிகள் அறிவுறுத்துகின்றனர்.
