கதாபாத்திரத்துக்காக உடல் இளைத்த சிவா

‘சிங்கிள் ஷங்கரும் ஸ்மார்ட்போன் சிம்ரனும்’ படத்தில் சிவா.

23 May 2022 05:30

அறிமுக இயக்குநர் விக்னேஷ் ஷா, மிர்ச்சி சிவா கூட்டணியில் உருவாகி வருகிறது 'சிங்கிள் ஷங்கரும் ஸ்மார்ட்போன் சிம்ரனும்' படம்.

முதல்தோற்றச் சுவரொட்டியில் 'அகில உலக சூப்பர் ஸ்டார் சிவா' என்று குறிப்பிட்டுள்ளனர். மேலும், குழந்தைகளின் மனம் கவர்ந்த ஹல்க், அயர்ன்மேன் கதாபாத்திரங்களும் இடம்பெற்றுள்ளன.

இந்தப் படத்தில் சிவா 'டெலிவரி பாய்' கதாபாத்திரத்தில் நடிக்கிறார். இதற்காக உடல் எடையில் 12 கிலோ குறைத்தாராம்.

"கொரோனா வேளையில் சிவாவைத் தொடர்பு கொண்டு கதையை விவரித்தேன். முன்னதாக, நேரில் வந்து கதை சொல்லட்டுமா என்று கேட்டபோது, 'பரவாயில்லை, தொலைபேசியில் கேட்டாலே என்ன மாதிரியான கதை என்பது புரிந்துவிடும்' என்றார்.

"முதன்முறையாக தொலைபேசியில் கதையை விவரித்ததால் சற்று பதற்றமாக உணர்ந்தேன். அதே சமயத்தில் இந்த வாய்ப்பைக் கைவிடவும் மனமில்லை.

"சிவாவை நேரில் சந்திக்க தாமதமானால் அவருடன் இணைந்து பணியாற்ற சற்றே காத்திருக்க வேண்டியிருக்கும் என்பதால் தொலைபேசியிலேயே கதையைச் சொன்னேன். அவருக்கு கதை பிடித்திருந்தது.

"கதாபாத்திரத்துக்காக உடல் எடை குறைக்க வேண்டும் என்றதும் ஒப்புக்கொண்டார். ஆனால், அவர் அப்படி செய்வாரா எனும் சந்தேகம் இருந்தது. முதல் நாள் படப்பிடிப்புக்கு வந்தபோது, உண்மையாகவே 12 கிலோ எடையைக் குறைத்து அசத்தலாக காட்சி அளித்தார்.

"அவர் படப்பிடிப்பில் பங்கேற்றால் கலகலப்புக்குப் பஞ்சமே இருக்காது. பதற்றம், கோபத்துக்கு இடமிருக்காது. அந்த அளவு ஜாலியாக இருப்பார்.

"தினமும் காலையில் அவர் வந்ததும் அன்றைய தினம் எடுக்கப்பட இருக்கும் காட்சிகளை விவரிப்பேன். பொறுமையாக அனைத்தையும் கேட்டுக்கொண்டு, காட்சியைப் படமாக்கும்போது தனது பாணியில் நடித்து மனம் கவர்வார்.

"படத்தலைப்பில் வரும் 'சிங்கிள்' சங்கர் கதாபாத்திரத்துக்கு நியாயம் செய்திருந்தாலும் வழக்கமான சிவாவையும் திரையில் காணமுடியும்," என்கிறார் விக்னேஷ் ஷா.

இந்தப் படத்தில் மேகா ஆகாஷ், அஞ்சு குரியன் என சிவாவுக்கு இரண்டு நாயகிகள் உள்ளனர்.

மேகாவின் கால்ஷீட்டுக்காக அணுகியபோது, இப்போது வாய்ப்பு இல்லை என்று தெரிவிக்கப்பட்டதாம்.

அவரது தாயாருடன் முன்பே அறிமுகம் இருந்ததால் நேரில் சென்று சந்தித்துள்ளார் விக்னேஷ். கதையைக் கேட்டுவிட்டு முடிவு செய்யுமாறு கேட்டுக்கொண்டாராம்.

அதன்பிறகு, மேகாவும் அவரது தாயாரும் கதை கேட்டதையும் மிக நன்றாக இருப்பதாகப் பாராட்டி நடிக்க ஒப்புக்கொண்டதையும் விவரிக்கத் தேவையில்லை.

அஞ்சு குரியன் தமிழில் அதிகம் நடித்தது இல்லை. மலையாள ரசிகர்களுக்கு நன்கு அறிமுகமானவர். நாயகனின் தந்தையாக பாடகர் மனோ, நண்பராக மா.கா.பா.ஆனந்த், விஜய் டிவி பாலா உள்ளிட்டோர் நடித்துள்ளனர்.

'ஓ மை கடவுளே' திரைப்படத்தில் அசத்திய லியோன் ஜேம்ஸ்தான் இசையமைத்துள்ளார்.

"என்னுடைய கதைக்குப் பொறுத்தமான இசையை அவரால் வழங்க முடியும் என நினைத்தேன். எனது கணிப்பு வீண்போகவில்லை. படத்தில் நான்கு பாடல்கள் உள்ளன. அவற்றை மேகா ஆகாஷ், அந்தோணிதாஸ், லியோன் ஜேம்ஸ், பரத் ஆகியோர் பாடியுள்ளனர்.

"சாண்டி மாஸ்டர் நடனம் அமைத்துள்ள 'சோறுதான் முக்கியம்' எனத் தொடங்கும் பாடல் இளையர்களைக் கவரும் வகையில் மிக அருமையாக உருவாகி உள்ளது. படம் விரைவில் வெளியீடு காணும்," என்கிறார் விக்னேஷ்.