தாய்மொழிகளின் கருத்தரங்கு நிகழ்ச்சியில் நேற்று இடம்பெற்ற கலந்துரையாடல் அங்கத்தில் பெற்றோர்களால் தாய்மொழியில் சரளமாகப் பேச இயலாவிட்டாலும், வீட்டுச் சூழலில் அவர்கள் தாய்மொழியில் பேச முனைய வேண்டும் என்றும், இவ்வாறு செய்யும்போது, பிள்ளைகளுக்குத் தங்களாலும் தாய்மொழியில் பேச முடியம் என்ற நம்பிக்கை ஏற்படும் என்றும் கல்வி அமைச்சர் சான் சுன் சிங் தெரிவித்தார்.
இளம் பிள்ளைகளுடன் தாய் மொழியில் ஆழமான உரையாடல்களில் எப்படி ஈடுபடுவது என்பதைக் குறித்த இந்த ஒரு மணி நேரக் கலந்துரையாடலைக் கல்வி துணை அமைச்சர் சுன் ஷுவெலிங் வழிநடத்தினனார்.
இக்கலந்துரையாடலில் பல கல்வி நிபுணர்களும் கலந்துகொண்டனர்.
முந்தைய தலைமுறையினரோடு ஒப்புநோக்கும்போது தாய்மொழியைக் கற்றுக்கொள்வதற்கு யூடியூப், இணையம் போன்ற அதிக வளங்கள் இருப்பதை அவர் சுட்டிக் காட்டினார்.
அவற்றை முறையாகப் பயன்படுத்தித் தாய்மொழி கற்றலை வலுப்படுத்தலாம் என்றும் அமைச்சர் கூறினார்.
பிள்ளைகள் தாய்மொழியில் உரையாடும்போது பிழைகள் ஏற்பட்டால், அவற்றிற்கு அதிக அளவு முக்கியத்துவம் கொடுத்து குறை கூறினால், பிள்ளைகள் தாய்மொழியில் பேசுவதைத் தவிர்க்க முனைவர் என்றார்.
மாறாக, பிள்ளைகளுக்குத் தொடர்ந்து ஊக்கமூட்ட பெற்றோர் முற்பட வேண்டும் என்றும் அமைச்சர் வலியுறுத்தினார்.
தாய்மொழியில் பேச முயற்சி செய்யும் பிள்ளைகளைப் பாராட்ட வேண்டும் என்று கலந்துரையாடலில் பங்கேற்ற சிண்டாவின் தலைமை நிர்வாக அதிகாரி திரு ரா. அன்பரசு கூறினார்.
தாய்மொழி கற்றல் ஒரு நீண்ட பயணம் என்றும் அப்பயணத்தில் பிள்ளைகளுக்கு நம்பிக்கை அளித்தவாறு, அவர்கள் தாய்மொழிகளில் மேம்பாடு காண வகைசெய்ய வேண்டும் என்றும் அவர் வலியுறுத்தினார்.
தேசிய கல்விக்கழகத்தின் கொள்கை, பாடத்திட்டம் மற்றும் தலைமைத்துவப் பிரிவின் மூத்த சக பயிற்றுநர் திருவாட்டி கா. குணவதியம்மாள், அண்மைய மக்கள் தொகை கணக்கெடுப்பு அறிக்கையில், ஆங்கிலப் புழக்கம் வீடுகளில் அதிகரித்துள்ளது என்பதைச் சுட்டினார். தாய்மொழிகளின் பயன்பாடு குறித்த மனப்போக்கை மாற்றுவது பெரிய சவாலாக விளங்குகிறது என்றும் குறிப்பிட்டார்.
அன்பான, வெளிப்படையாக உணர்ச்சிகளை வெளிகாட்டும் கற்றல் சூழலை உருவாக்கி, பிள்ளைகளுடைய சின்னஞ்சிறு வெற்றிகளைக் கொண்டாட வேண்டும் எனக் குறிப்பிட்டார். மேலும் விறுவிறுப்பான முறையில் தாய்மொழியைக் கற்பிப்பது கற்றல் சவால்களை எதிர்கொள்ள உதவும் என்று தாம் நம்புவதாகவும் தெரிவித்தார்.
பெற்றோர்களாக இருக்கும் உள்ளூர் பிரபலங்களின் தாய்மொழி கற்பித்தல் உத்திகளைப் பற்றி மேல் விவரம் அறிய, https://www.mtls.edu.sg/ என்ற இணையப் பக்கத்திற்குச் செல்லலாம்.