ஆண்களைவிடக் கூடுதல் நேரம் உறங்க வேண்டும் என்கின்றனர் மருத்துவ வல்லுநர்கள்.
உடல், உள்ளம், உணர்வு என மனிதனின் முழுமையான நலத்தைப் பேணுவதில் உறக்கத்திற்கு முக்கியப் பங்குண்டு.
அதிலும் குறிப்பாக, போதிய நேரத்திற்கு உறங்காமல் இருப்பது ஆண்களைவிடப் பெண்களிடத்தில் அதிகக் கேடுகளை விளைவித்துவிடும் என்கிறார் அமெரிக்காவைத் தளமாகக் கொண்ட 'ரெஸ்மெட்' மருத்துவக் கருவிகள் நிறுவனத்தின் டாக்டர் சிபாஷிஷ் டே.
ஒரு நாளைக்கு ஆணும் பெண்ணும் எவ்வளவு நேரம் உறங்க வேண்டும் என்பதில் சற்றே மாறுபாடு உள்ளதாக 2014ஆம் ஆண்டு அமெரிக்காவின் தேசிய மருத்துவ நூலகம் வெளியிட்ட ஓர் ஆய்வுக் கட்டுரை தெரிவிக்கிறது.
"உடலமைப்பின் காரணமாக, ஆண்-பெண் இடையே உறக்க நேரம் சற்று மாறுபடும் என்பதைப் பல ஆய்வு முடிவுகள் காட்டுகின்றன. இதில், அவர்கள் ஒரு நாளை எப்படிச் செலவழிக்கின்றனர் என்பது முக்கியமானது," என்றார் டாக்டர் சிபாஷிஷ்.
ஆண்களைவிடப் பெண்கள் கிட்டத்தட்ட 11-13 நிமிடங்கள் கூடுதலாக உறங்குவர் என்ற அவர், அதே நேரத்தில் ஆண்கள் ஆழ்ந்து உறங்குவர் என்றும் சொன்னார்.
குடும்பத்தில் உள்ள மற்றவர்களைப் பார்த்துக்கொள்வதற்காக பெண்கள் உறங்கும்போது இடையில் எழ நேரிடலாம். இடையூறு இல்லாத உறக்கமே நற்பலனைத் தரும்.
அதிக நேரம் உறங்குவது ஏன்?
ஆண்களைவிடப் பெண்கள் உறக்கமின்மையால் பாதிக்கப்பட 40% அதிக வாய்ப்புள்ளதாகச் சொல்லப்படுகிறது. கால்களை அசைத்தே ஆக வேண்டும் எனக் கட்டுப்படுத்த முடியாத தூண்டுதலால் இடையில் உறக்கம் தடைபட்டு, கூடுதல் நேரம் உறங்க நேரிடலாம்.
வாழ்நாள் முழுவதும் பெண்கள் பல்வேறு நாளமில்லாச் சுரப்பு (hormone) மாற்றங்களை எதிர்கொள்வர். இந்த மாற்றங்கள் 'சர்க்கேடியன் சுழற்சி'யில் இடையூறை ஏற்படுத்தி, கூடுதல் நேரம் உறங்கும்படி செய்யலாம்.
அதுபோல, பெண்கள் கூடுதல் நேரம் உறங்குவதற்கு மனநலமும் ஒரு காரணம்.
"ஆண்களைக் காட்டிலும் பெண்கள் மனவுளைச்சலுக்கு ஆளாக இருமடங்கு வாய்ப்புள்ளது. அதனால் நல்ல மனநலத்திற்கு அவர்கள் நன்றாக உறங்க வேண்டியது அவசியம்," என்கிறார் டாக்டர் சிபாஷிஷ்.
அத்துடன், தனிப்பட்ட வாழ்க்கைமுறையையும் உடற்திறனையும் பொறுத்து உறங்கும் நேரம் மாறுபடலாம் எனக் கூறப்படுகிறது.
உறக்கமின்மையால் ஏற்படும் பாதிப்புகள்
போதிய நேரம் உறங்காவிடில், ஆண்களைவிடப் பெண்களிடம் அதிக பாதிப்புகளை ஏற்படுத்திவிடலாம். போதிய நேரம் உறங்காத பெண்களுக்கு இரத்த அழுத்தம், இரண்டாம் நிலை நீரிழிவு, மனஅழுத்தம், மனநலக் குறைபாடு ஆகியவை ஏற்படும் வாய்ப்பு அதிகம் எனப் பல்வேறு ஆய்வு முடிவுகள் காட்டுகின்றன.
ஏழு முதல் எட்டு மணி நேரம் உறங்கும் பெண்களைக் காட்டிலும், ஏழு மணி நேரத்திற்கும் குறைவாக உறங்கும் பெண்களுக்குக் கருத்தரிக்கும் வாய்ப்பு 15% குறையக்கூடும் என்றும் சொல்லப்படுகிறது.