கடந்த 1969ஆம் ஆண்டில் முதலாவது ஆயுதப் படை தினத்தின்போது அச்சிடப்பட்ட முன்னாள் உள்துறை, தற்காப்பு அமைச்சர் லிம் கிம் சானின் கட்டுரை அடங்கிய 'மிரர்' நாளிதழ், 1969ஆம் ஆண்டு தேசிய தின அணிவகுப்பின் கையேடுகள், 1968ஆம் ஆண்டில் 'டோட்டோ' அறிமுகப்படுத்தப்பட்டபோது வெளியான சுவரொட்டிகள்.
சிங்கப்பூர் சிற்பிகள் நினைவகத்துக்கு பொதுமக்கள் சமர்ப்பித்து வரும் வரலாற்றுப் பொருள்களில் இவை சில.
சிங்கப்பூரை வழிநடத்திய முன்னோடித் தலைமுறையின் இலக்குகளை எடுத்துரைக்கவும், சிங்கப்பூர் சுதந்திரம் பெறுவதற்கு உதவிபுரிந்து அதன் வளர்ச்சிக்கு வழி வகுத்தவர்களை அங்கீகரிக்கவும் சிங்கப்பூர்ச் சிற்பிகள் நினைவகம் அமைக்கப்படவுள்ளது.
நினைவகத்தின் ஓர் அங்கமாக இவ்வாண்டின் ஏப்ரல் மாதத்தில் 'உங்கள் கதையை பகிர்ந்துகொள்ளுங்கள், நம் நினைவகத்தை வடிவமையுங்கள்' என்ற நடமாடும் கண்காட்சி அறிமுகப்படுத்தப்பட்டது.
1950களிலிருந்து 1970கள் வரை சிங்கப்பூரின் வளர்ச்சியை பிரதி பலிக்கும் கதைகளையும் கலைப் பொருட்களையும் வழங்க சிங்கப்பூரர்கள் கேட்டுக்கொள்ளப்பட்டனர்.
சிங்கப்பூரரான திரு எட்மண்ட் வாங் ஜூ சியாட் வட்டாரத்தில் அமைந்திருந்த கிம் சூ குவே சாங் கடையின் வரலாறு, அதன் சிறப்பு கள், அக்கடையை நடத்துவதில் அதன் நிறுவனர் திருவாட்டி லீ கிம் சூவுக்கு ஏற்பட்ட சவால்கள் ஆகியவற்றைக் கதையாக கண்காட்சிக்காக வழங்கினார்.
கண்காட்சிக்காக அரிய வரலாற்றுப் பொருளை வழங்கிய அமைப்புகளில் தெலுக் குராவ் தொடக்கப்பள்ளியும் அடங்கும்.
சிங்கப்பூரின் முன்னைய பிரதமர் லீ குவான் இயூவின் பெயர் இடம்பெற்றுள்ள தெலுக் குராவ் கிழக்கு மாணவர் சேர்க்கை பதிவேட்டை அது அளித்தது.
பிப்ரவரி 2023ஆம் ஆண்டு வரை வெவ்வேறு இடங்களில் நடைபெறவிருக்கும் இக்கண்காட்சி சிற்பிகள் நினைவக இணையத்தளத்திலும் மெய்நிகராக இடம்பெறும்.
கண்காட்சிக்கு வரலாற்றுப் பொருள்களை வழங்க கீழ்க்கண்ட முகவரிக்குச் செல்லலாம்: go.gov.sg/shapeourmemorial
- செய்தி: ஹர்ஷிதா பாலாஜி