மாணவர் முரசு
இ-பேப்பர்
இங்கிலிஷ் பிரிமியர் லீக் போட்டியின் இறுதி ஆட்டங்கள் இன்றிரவு நடைபெறவுள்ளன. இவற்றுக்காக குறிப்பாக லிவர்பூல், மான்செஸ்டர் சிட்டி ரசிகர்கள் ஆவலுடன் எதிர்பார்த்துக் காத்திருக்கின்றனர். பிரிமியர் லீக் பட்டியலில் மான்செஸ்டர் சிட்டி தற்பொழுது லிவர்பூலைவிட 1 புள்ளி அதிகம் பெற்று முன்னிலையில் உள்ளது. இந்நிலையில், இரு குழுக்களும் இன்று போட்டியிடும் ஆட்டங்களே லீக் கிண்ணத்தை வெல்லப்போவது யார் என்பதை நிர்ணயிக்கும். இது குறித்து இரு குழுக்களின் ரசிகர்களின் கருத்துகளை கேட்டறிந்தது தமிழ் முரசு.
லிவர்பூல் ரசிகரான 21 வயது அரவிந்தன் கதிரறிவன், லிவர்பூல் லீக் கிண்ணத்தை வெல்ல வலுவான வாய்ப்புள்ளது எனக் கூறுகிறார். லிவர்பூல், உல்வ்ஸ் அணியுடன் மோதும் ஆட்டத்தில் லிவர்பூல் வெற்றியடையும் என்பதில் அதிக நமபிக்கை கொண்டுள்ளார் இவர்.
அதுமட்டுமின்றி, மான்செஸ்டர் சிட்டி தனது இறுதி ஆட்டத்தில் ஆஸ்டன் வில்லா அணியுடன் மோதவுள்ளது.
ஆஸ்டன் வில்லாவின் தற்போதைய நிர்வாகி, முன்னாள் லிவர்பூல் அணித் தலைவர் ஸ்டீவன் ஜெரார்ட் என்பதாலும் அவ்வணியின் முக்கிய ஆட்டக்காரரான, பிலிப் கொட்டின்யோ, என்பதாலும் அவர்கள் லிவர்பூல் லீக் பட்டத்தை வெல்லும் நோக்குடன் சிட்டியை எதிர்த்து களமிறங்குவர் என்கிறார் இவர்.
ஆஸ்டன் வில்லாவுடன் மான்செஸ்டர் சிட்டி சமநிலை கண்டாலே, லிவர்பூல் கிண்ணத்தை வெல்வது உறுதி என்று இவர் கூறுகிறார்.
இவரைப் போலவே, பா தர்ஷன், 22, என்ற லிவர்பூல் ரசிகர் லிவர்பூல் அணி வீரர்கள் ஒவ்வோர் ஆட்டத்திலும் சிறப்பாக விளையாடி, இரு அணிகளுக்கும் இருந்த 14 புள்ளி இடைவெளியை ஒரு புள்ளிக்கு குறைத்துள்ளதை சுட்டுகிறார்.
பல சாம்பியன்ஸ் லீக் ஆட்டங்கள், நான்கு நாள் இடைவெளியில் எவர்ட்டன், மான்செஸ்டர் யுனைடெட் போன்ற வலுவான குழுக்களுடன் ஆட்டங்கள், ஒரே வாரத்தில் மான்செஸ்டர் சிட்டியுடன் இரண்டு ஆட்டங்கள் என நெருக்கடியான ஒரு மாத காலத்தை லிவர்பூல் கடந்து வந்துள்ளளதால் லிவர்பூலே சிறந்த குழு என்று இவர் கூறுகிறார்.
இவர்களுக்கு மாறாக சில ரசிகர்கள் லிவர்பூல் லீக் பட்டம் வெல்வது கடினம் என்கின்றனர். “லிவர்பூல் இவ்வாண்டு லீக் பட்டத்தை வெல்வது கடினம். ஏனெனில், மான்செஸ்டர் சிட்டி ஆஸ்டன் வில்லாவிடம் தோற்கும் வாய்ப்பு மிக மிகக் குறைவு.” என்கிறார் லிவர்பூல் ரசிகரான சரவணன் ஜெகதீசன், 21.
மான்செஸ்டர் சிட்டி ரசிகர்கள், தங்கள் அணி எப்படியாவது லீக் பட்டத்தை வென்றுவிட வேண்டும் என்ற வேட்கையுடன் உள்ளனர். “லிவர்பூல் லீக் பட்டத்வெதை வெல்லக்கூடாது.
ஒவ்வொரு வாரமும் 2-1, 1-0 போன்ற குறுகிய கோல் வித்தியாசத்தில் ஆட்டங்களை வென்று 3 புள்ளிகள் பெற்றனர்,” என்று கூறுகிறார் 21 வயதான மான்செஸ்டர் சிட்டி ரசிகர் நூருல் நாஜிப்.
மான்செஸ்டர் சிட்டி சாம்பியன்ஸ் லீக் போட்டியிலிருந்து வெளியேறிவிட்டதால் பிரிமியர் லீக் பட்டத்தை வென்றால் சிறப்பாக இருக்கும் என இவர் கருதுகிறார்.
நவ்ஃபால் சலீம் என்ற 21 வயதான மான்செஸ்டர் சிட்டி ரசிகர் தனது அணி கண்டிப்பாக லீக் கிண்ணத்தை வெல்லும் என நம்புகிறார்.
காரபாவ் கிண்ணப் போட்டியில் ஏற்கெனவே வென்றுள்ள லிவர்பூல், லீக் பட்டத்தையும் வெல்லுமானால், அது பங்கேற்கும் சாம்பியன்ஸ் லீக்,
எஃப்ஏ கிண்ண இறுதிப் போட்டி ஆகியவற்றிலும் வெல்லும் வாய்ப்பை அதிகரித்துவிடும், அது கூடாது என்கிறார்.
எந்த அணி ரசிகர்கள் காட்டில் மகிழ்ச்சி வெள்ளம் பெருக்கெடுக்கப் போகிறது என்பது இன்றிரவு தெரிந்துவிடும்.
