மாணவர் முரசு
இ-பேப்பர்
அமெரிக்க அதிபர் டோனல்ட் டிரம்ப், தமது நிர்வாகத்தைச் சாடிய பிரிட்டிஷ் தூதரையும் பிரிட்டிஷ் பிரதமர் தெரேசா மேயையும் கண்டித்திருக்கிறார். டிரம்ப்பின் நிர்வாகம் “சீரற்றது” என்றும் “திறமையில்லாதது” என்றும் அந்தத் தூதர் கூறியதைக் காட்டும் தனிப்பட்ட குறிப்புகள் கசிந்தது குறித்து பிரிட்டன் வருத்தத்துடன் இருக்கும் வேளையில் திரு டிரம்ப் தமது காட்டத்தை வெளிப்படுத்தினார்.
“டிரம்ப் நிர்வாகத்தினரிடம் நாங்கள் பேசி வருகிறோம். இந்தத் தகவல் கசிவு ஏற்புடையதன்று. இதற்காக நாங்கள் நிச்சயம் வருந்துகிறோம்,” என்று திருமதி மேயின் பேச்சாளர் செய்தியாளர்களிடம் தெரிவித்தார்.
இதற்குப் பதிலடியாக, பிரெக்சிட் விவகாரத்தைத் திருமதி மே கையாண்ட விதத்தைத் திரு டிரம்ப் குறை கூறினார். தமது ஆலோசனைக்குத் திருமதி மே செவிசாய்க்கவில்லை என்று திரு டிரம்ப் கூறினார்.
“அவரும் அவரது பிரதிநிதிகளும் இப்படி ஒரு குழப்படியை உருவாக்கியுள்ளனர். எனக்கு அந்தத் தூதரைத் தெரியாது. ஆனால் அமெரிக்காவில் அவர் மீது நல்ல அபிப்பிராயம் இல்லை. அவருடன் நான் ஒத்துழைப்பதாக இல்லை,” என்றார் திரு டிரம்ப்.
மேலும், பிரிட்டனுக்குப் புதிய பிரதமர் ஒருவர் கிடைக்கப்போவது நல்ல செய்தி என்றும் பிரிட்டனுக்குச் சென்றபோது தம்மை பெரிதும் கவர்ந்தவர் எலிசபத் அரசிதான் என்றும் திரு டிரம்ப் கூறினார்.
