இந்து இளங்கோவன்
சிவாஜி கணேசன், எம்ஜிஆர் பாடல்களை விரும்பி கேட்கும் தாத்தா பாட்டிகளின் செவிகளுக்கு விருந்தூட்டவும் அவர்களுள் தனிமையில் இருப்பவர்களுக்குச் செவி கொடுக்கவும் 'வின்டேஜ் ரேடியோ'. கடந்த ஓராண்டாகச் செயலாற்றி வருகிறது
கைத்தொலைபேசி செயலி, இணையம் வழி இயங்கும் இந்த இலவச வானொலியில் தினமும் இரவு 8 மணியிலிருந்து 10 மணி வரை தமிழ்ப் பாடல்கள் ஒலிபரப்பட்டு வருகின்றன.
1950களிலிருந்து 1970கள் வரையிலான நினைவில் நீங்கா தமிழ் பாடல்களைத் தேர்வு செய்து, அவற்றைப் பற்றிய விவரங்களையும் துணுக்குகளையும் கூறி மூத்தோரை மீண்டும் அக்காலத்திற்கே அழைத்து செல்கிறார் முன்னாள் வானொலி படைப்பாளர் திரு பி. என். பாலா.
ரசித்துக் கேட்க பாடல்கள் மட்டும் அல்ல, இந்த வேகமான வாழ்க்கைச் சூழலில் தொழில்நுட்ப வளர்ச்சிக்கு ஈடுகொடுக்க சிரமப்படும் நமது மூத்தோருக்கு முக்கிய தகவல்களை மிக எளிய முறையில், தெளிவாகக்கொண்டு சேர்க்கிறது வின்டேஜ் ரேடியோ.
கிருமித்தொற்று விவரங்கள், தடுப்பூசி தகவல்கள், மூத்தோருக்கான அரசாங்கத் திட்டங்கள், பார்த்து செய்ய எளிய உடற்பயிற்சி காணொளிகள் என அவசியமான தகவல்களை நேரடியாக புரிந்த மொழியில் தெரிந்த குரலில் மூத்தோரைச் சென்றடைகின்றன.
முன்கூட்டியே ஒலிப்பதிவு செய்து பின்பு ஒளிபரப்பப்படும் இந்த வானொலியை படைப்பது திரு பாலாவிற்கு புதுமையான அனுபவமாகவே இருக்கிறது.
உடனுக்குடன் நேரலையில் படைத்து பழகிய இவருக்கு நேயர்கள் கேட்டுக்கொண்டிருப்பதுபோல் கற்பனை செய்து நிகழ்ச்சியை ஒலிப்பதிவு செய்வது மாறுபட்ட அனுபவமாக உள்ளதாக கூறினார்.
கடந்த 2019-ஆம் ஆண்டு பணி ஓய்வு பெற்ற இவர், தொடர்ந்து தனது ஓய்வு காலங்களையும் வானொலி துறைக்கு அர்ப்பணிக்கிறார்.
வின்டேஜ் ரேடியோவில் இசை 24 மணிநேரமும் ஒலிபரப்பப்படும். படைப்பாளர்கள் காலை 8 மணி முதல் நள்ளிரவு வரை மட்டுமே நிகழ்ச்சிகளை வழங்குவர்.
"தனிமையில் இருக்கும் முதியவர்கள், பொழுதை எப்படி கழிப்பது என்று புரியாத முதியவர்களுக்கு இந்த வானொலி கண்டிப்பாக துணையாக இருக்கும். நேயர்களுடன் நேரடி தொடர்பு இல்லை என்றாலும், வானொலியைக் கேட்கும் சிலர் எங்களது வாட்ஸாப்பிற்கு குறுந்தகவல் அனுப்பி பாடல்களை விரும்பிக் கேட்பர். வின்டேஜ் ரேடியோ தமிழ் நிகழ்ச்சிகளில் நான் பாடல் வரிகளின் நுணுக்கங்களை பற்றியும் பொருளைப் பற்றியும் நிறைய ஆராய்வேன்.
"இப்போது புதிதாக பழைய இடங்கள், குறிப்பாக திரையரங்கங்கள், அங்கு எந்தெந்த ஆண்டுகளில் என்னென்ன படங்கள் திரையிடப்பட்டன, இடங்களின் வரலாறு போன்றவற்றை பற்றிய சுவையான தொகுப்பை படைத்து வருகிறேன்.
பழைய பாடல்களிலும் படங்களிலும் நாட்டம் கொண்டவர் இந்த வானொலியை கேட்கலாம்." என்றார் வானொலி படைப்பாளராக மட்டும் அல்ல பாடகராகவும் வளம் வந்த திரு பாலா.
தொழில்நுட்பத்தை அதிகம் பயன்படுத்தத் தெரியாதவர்கள் கூட எளிமையாக பயன்படுத்தும் விதத்தில் இந்த வின்டேஜ் ரேடியோ செயலி உருவாக்கப்பட்டுள்ளது. செயலியை 'கூகல் பிளே' அல்லது 'ஏப் ஸ்டோர்' வழியே பதிவிறக்கம் செய்யலாம்.