உடல் பருமனைக் கையாள போதுமான தூக்கம் உதவக்கூடும் என்கிறது ஓர் ஆய்வு. இது, inews.co.uk இணையத்தளத்தில் தெரிவிக்கப்பட்டது.
இந்த ஆய்வில் பங்கேற்ற 80 பேரில் சராசரியாக ஒருவருக்கு, மூவாண்டுகளில் ஒரு நாளைக்குக் கூடுதலாக 72 நிமிடங்கள் தூங்கியதன் மூலம் சுமார் 11.8 கிலோகிராம் உடல் எடை குறைந்தது. கூடுதல் நேரம் தூங்கியதால் ஆய்வின் பங்கேற்பாளர்களுக்குப் பசி எடுப்பது குறைந்தது.
இதைத் தொடர்ந்து அவர்கள் ஒவ்வொருவரும் ஒரு நாளைக்கு உட்கொண்ட உணவின் அளவு 279 கேலரிக்கள் குறைந்தன. இது, செரிமானத்திற்கு உதவுவதாகச் சொல்லப்படும் மூன்று 'சாக்லெட் டைஜெஸ்டிவ் பிஸ்கட்டு'களின் கேலரிக்களுக்கு சமம்.
பங்கேற்பாளர்களின் உடல் எடை குறைவதற்கு இது ஒரு காரணம்.
"சமுதாயத்தில் பரவலாகக் காணப்படும் உடல் பருமன் பிரச்சினைக்கு எதிரான போராட்டத்தில் போதுமான தூக்கம் தீர்வாக அமையலாம்," என்று சிகாகோ பல்கலைக்கழகத்தின் சுவாச மருத்துவர் எஸ்ரா டசாலி கூறினார்.
"ஆய்வின் பங்கேற்பாளர்கள் உடல் ரீதியான நடவடிக்கைகளை அதிகரிக்காமல் தாங்கள் உட்கொள்ளும் கேலரிக்களைக் குறைத்துக்கொண்டனர், இதனால் உட்கொண்ட கேலரிக்களின் அளவு உடல் பயன்படுத்திய கேலரிக்களைவிடக் குறைவு, இது அவர்கள் உடல் எடை குறைய உதவியது," என்றும் டாக்டர் டசாலி குறிப்பிட்டார்.
பங்கேற்பாளர்களின் உடல் ரீதியிலான நடவடிக்கைகளில் மாற்றம் ஏதும் இல்லாதபோது கூடுதல் நேரம் தூங்குவதன் மூலம் அவர்களுக்குப் பசி எடுப்பது குறைந்ததற்கான காரணம் அவருக்குப் புரியவில்லை. எனினும், இரவில் அமைதியாகத் தூங்குவது உடலில் பசியை ஏற்படுத்தும் அம்சத்தை சீராக்கலாம் என்பது அவரின் விளக்கம்.
இந்த ஆய்வு முடிவுகள் 'ஜாமா மெடிக்கல் ஜர்னல்' எனும் மருத்துவ சஞ்சிகையில் வெளியாகியுள்ளது. 'பிஎம்ஐ' எனப்படும் உடல் எடையைக் கணிக்கும் உடல் எடைக் குறியீடு 25லிருந்து 30 வரை இருந்தவர்கள் இதில் பங்கேற்றனர்.
உடல் எடைக் குறியீடு 30க்கு மேல் இருந்தால் ஒருவர் பருமனாக இருக்கிறார் என்று பொருள். இதன் தொடர்பில் எதற்கும் மருத்துவர்களையோ சுகாதாரத்துறை நிபுணர்களையோ நாடுவது நல்லது.