மாணவர் முரசு
இ-பேப்பர்
சிங்கப்பூரில் பல ஆண்டுகளுக்குப் பிறகு ஒரு லிட்டர் பெட்ரோலின் விலை $2க்கும் கீழே இறங்கியுள்ளது. கடந்த இரு வார காலத்துக்குள் இரண்டாவது முறையாக பெட்ரோலின் விலை வீழ்ச்சி கண்டுள்ளது.
சிங்கப்பூர் பயனீட்டாளர் சங்கத்தின் (CASE) பெட்ரோல் விலை கண்காணிப்பு செயலியான Fuel Kaki-ன் தகவலின்படி, 95-ஆக்டேன் பெட்ரோலின் விலை 5 சென்ட் குறைந்து லிட்டருக்கு $1.99 ஆகியிருப்பதாகத் தெரிவிக்கப்பட்டுள்ளது.
கச்சா எண்ணெய் விலை வீழ்ச்சிகண்டதையடுத்து, சில்லரை விற்பனையாளர்கள் பெட்ரோல் விலையைக் கடந்த வாரம் 5 முதல் 6 சென்ட் வரை குறைத்தபோது இந்த விலை $2.04 ஆக இருந்தது.
தற்போது மலிவுவிலை ரகமான 92-ஆக்டேன் ரக பெட்ரோலின் விலை லிட்டருக்கு $1.95 ஆக உள்ளது. ஷெல், சினோபெக் ஆகிய நிறுவனங்கள் இந்த ரக பெட்ரோலை விற்பனை செய்வதில்லை.
98-ஆக்டேன் ரக பெட்ரோலை லிட்டருக்கு $2.33 என்ற விலையில் எஸ்பிசியும் $2.47 என்ற விலையில் கால்டெக்சும் விற்பனை செய்கின்றன. இந்த சிறப்பு ரக பெட்ரோலை ஷெல் நிறுவனம் லிட்டருக்கு $2.60 என்ற விலையிலும் சினோபெக் $2.50 என்ற விலையிலும் விற்பனை செய்கின்றன.
விற்பனை நிலையங்கள் வழங்கும் விலைக் கழிவுக்கு முந்தைய விலை இவை.
சில்லரை விற்பனைக் கடைகளில் இந்த 5 சென்ட் விலைக் குறைப்பு, மொத்த விற்பனையில் கச்சா எண்ணெய் விலை 20 முதல் 25% விலை குறைந்திருப்பதைக் குறிப்பதாக கவனிப்பாளர்கள் குறிப்பிடுகின்றனர்.
ஆனால், டீசலின் விலை தொடர்ந்து மாற்றமின்றி இருக்கிறது. எஸ்பிசி லிட்டருக்கு $1.64 விலைக்கும் மற்ற நிறுவனங்கள் $1.67 விலைக்கும் டீசலை விற்பனை செய்கின்றன.
கொவிட்-19 காரணமாக பல நாடுகள் இன்னும் முடக்கநிலையில் இருப்பதாலும் விமானப் போக்குவரத்துக்கான கச்சா எண்ணெய் தேவையில் மாற்றம் இல்லாததாலும் அனைத்துலக அளவில் கச்சா எண்ணெய்யின் தேவை குறைவாக இருப்பதையும் கவனிப்பாளர்கள் சுட்டிக்காட்டி உள்ளனர்.
