சிங்கப்பூரில் அடுத்த ஆண்டிற்கான பொது விடுமுறை பட்டியலை மனிதவள அமைச்சு வெளியிட்டுள்ளது. அடுத்த ஆண்டு ஐந்து நீண்ட வாரயிறுதிகள் இருக்கும். இவ்வாண்டு உள்ள நான்கு நீண்ட வாரயிறுதிகளைவிட அது ஒன்று அதிகம்.
அடுத்த ஆண்டு 11 பொது விடுமுறைகள் உள்ளன. அவற்றில் மூன்று விடுமுறைகள் ஞாயிற்றுக்கிழமைகளில் வரும். இரண்டு விடுமுறைகள் திங்கட்கிழமைகளிலும் ஒரு விடுமுறை வெள்ளிக்கிழமையிலும் வரும்.
எனினும், 2022ல் மே தினமும் நோன்புப் பெருநாளும் மே 1, 2 ஆகிய தேதிகளில் அடுத்தடுத்து வருவதால், அந்த நீண்ட வாரயிறுதி நான்கு நாட்களைக் கொண்டிருக்கும். அதாவது, அடுத்த ஆண்டு மே 1ஆம் தேதி ஞாயிற்றுக்கிழமையாக இருப்பதாலும் அதற்கு அடுத்த நாள் திங்கட்கிழமை பொது விடுமுறை நாளாக இருப்பதாலும் செவ்வாய்க்கிழமை, மே 3ஆம் தேதி விடுப்பு நாளாக இருக்கும்.
ஞாயிற்றுக்கிழமைகளிலும் வரும் மற்ற இரு பொது விடுமுறைகள் விசாக தினமும் கிறிஸ்மஸ் தினமும் ஆகும். திங்கட்கிழமை, அக்டோபர் 24ஆம் தேதி வரும் மற்றொரு விடுமுறை தீபாவளி. வெள்ளிக்கிழமை, ஏப்ரல் 15ஆம் தேதி புனித வெள்ளி ஆகும்.