பழமொழிகள், செய்யுள்கள் போன்றவற்றை தொடக்கப்பள்ளியிலும் உயர்நிலைப்பள்ளியிலும் பயில்வதோடு சரி. நம்மில் பெரும்பாலானோர் அவற்றை மீண்டும் படிப்பதும் இல்லை பயன்படுத்துவதும் இல்லை.
ஆனால் கடந்த ஒரு வாரமாக இன்ஸ்ட்டாகிராம் பயன்படுத்தும் தமிழ் இளைஞர்களிடையே வலம்வந்து கொண்டிருக்கிறது அழகான, எளிமையான தமிழ்ச் செய்யுள்கள்.
நன்யாங் தொழில்நுட்பப் பல்கலைக்கழகத் தமிழ் இலக்கிய மன்ற முன்னாள் மாணவர் சங்கம் தயாரித்திருக்கும் 'செய்யுளைக் கண்டுபிடி!' என்னும் சுவாரசியமான இன்ஸ்டகிராம் ஃபில்டர் (Instagram Filter) தற்போது இளையர்கள் விரும்பிப் பார்க்கும் சமூகப் பக்கங்களில் ஒன்றாக உள்ளது.
இளைஞர்களுக்கு புரியும் விதத்தில் விளையாட்டுன் கூடிய கற்றல் நடவடிக்கையாக உருவாக்கப்பட்டுள்ள இந்த 'ஃபில்டர்' சுமார் 1900 முறைக்கு மேல் இன்ஸ்டகிராமில் பயன்படுத்தப்பட்டுள்ளது.
இளைஞர்களை கவர்ந்திழுக்கும் இன்ஸ்டகிராம் போன்ற சமூக ஊடகத் தளங்களில் அவர்களுக்கு எளிய முறையில் தமிழை கொண்டு சேர்க்கும் நோக்கத்தில் இந்த முயற்சி எடுக்கப்பட்டதாகத் தெரிவித்தார் நன்யாங் தொழில்நுட்பப் பல்கலைக்கழகத் தமிழ் இலக்கிய மன்ற முன்னாள் மாணவர் சங்கத்தலைவர் செம்பியன் சோமசுந்தரம்.
தொழில்நுட்பம் என்பது நமது அன்றாட வாழ்க்கையில் குறிப்பாக இளைஞர்களின் வாழ்க்கையில் ஒருங்கிணைந்த ஒன்றாகிவிட்டது. தமிழ் மொழிப் புழக்கத்தையும் ஆர்வத்தையும் அதிகரிக்க இன்றைய இளைஞர்களுக்கு தெரிந்த, புரிந்த விதத்தில் தொழிநுட்பத்தைத் தழுவிய ஏற்பாடு இது என்று குறிப்பிட்டார் செம்பியன் சோமசுந்தரம்.
"வைகறைத் துயில் எழு", "கெடுவான் கேடு நினைப்பான்" போன்ற பல எளிய ஆத்திசூடி/பழமொழி களை இந்த இன்ஸ்டகிராம் 'ஃபில்டர்'ல் காணலாம்.
ஃபில்டருக்கான குறியீட்டு முறைகளைத் தயாரித்து இந்த சுவாரசியமான யோசனைக்கு உயிர் கொடுத்தவர் சங்க உறுப்பினர் விஸ்வாணி ஜெயக்குமார். இந்த முயற்சிக்கு தமிழ் இளையர் களிடம் நல்ல வரவேற்பு இருந்ததால் சங்கம் தொடர்ந்து இதை மேலும் மேம்படுத்தி விரிவுபடுத்தும் என்றார் அவர்.
என்டியு தமிழ் இலக்கிய
முன்னாள் மாணவர்கள் சங்கம் 2016ல் உருவாக்கப்பட்ட ஓர் அமைப்பு. முன்னர் என்டியு டிஎல்எஸ் குழுக்களில் உறுப்பினர்களாக இருந்த இளைஞர்களைக் கொண்ட இக்குழு தொடர்ந்து தமிழ், தமிழ் இலக்கியம் சார்ந்த நடவடிக்கைகளை முன்னின்று நடத்தி வருகிறது. இந்த இன்ஸ்டகிராம் ஃபில்டரை பயன்படுத்திப் பார்க்க வலதுபக்கத்தில் உள்ள கியூஆர் குறியீட்டை வருடி நன்யாங் தொழில் நுட்பப் பல்கலைக்கழகத் தமிழ் இலக்கிய மன்ற முன்னாள் மாணவர் சங்கதின் இன்ஸ்டகிராம் பக்கத்திற்குச் செல்லுங்கள்.
செய்தி: இந்து இளங்கோவன்
படம்: நன்யாங் தொழில்நுட்பப் பல்கலைக்கழகத் தமிழ் இலக்கிய மன்ற முன்னாள் மாணவர் சங்கத்தின் தலைவர் செம்பியன் சோமசுந்தரம் 'செய்யுளைக் கண்டுபிடி' இன்ஸ்டகிராம் ஃபில்டரை சோதித்துப் பார்க்கிறார். படம்: NTUTLSAA