ரசிகர்கள்: ‘அண்ணாத்த’ தீபாவளிக்கு வரமாட்டாரா?

சிறுத்தை சிவா இயக்கத்தில் ரஜினிகாந்த், நயன்தாரா, கீர்த்தி சுரேஷ், குஷ்பு, மீனா உள்ளிட்டோர் நடித்திருக்கும் 'அண்ணாத்த' படம் நவம்பர் மாதம் 4ஆம் தேதி தீபாவளி அன்று திரையரங்குகளில் வெளியாகும் என்று 'சன் பிக்சர்ஸ்' நிறுவனம் அறிவிப்பு வெளியிட்டிருந்தது. பின்பு அந்த அறிவிப்பை உறுதி செய்யும் வகையில் டுவிட்டரிலும் பதிவிட்டிருந்தது.

ஆனால் படம் வெளியாக இன்னும் ஒரு மாதமே இருக்கும் நிலையில் படத்திற்கான விளம்பரமோ முன்னோட்டக் காட்சியோ வெளியாகாமல் இருக்கிறது. அதனால் படம் தீபாவளி பந்தயத்தில் இருந்து விலகிவிட்டதோ என்று ரஜினி ரசிகர்கள் சந்தேகிக்கிறார்கள்.

"சூப்பர் ஸ்டாரின் படம் வெளியாக இருக்கிறது. இந்நேரம் அதற்கான வேலைகளைத் தொடங்கவேண்டாமா?" என்கிறார்கள் ரஜினி ரசிகர்கள்.

ரசிகர்களை சமாதானப்படுத்தும் நோக்கத்தில் படத்தின் இசையமைப்பாளர் டி.இமான் படத்தின் விளம்பரத்திற்கு இரண்டு வாரங்கள் போதும் என்று டுவிட் செய்துள்ளார்.

இந்நிலையில் 'தலைவர் 169' படத்தை 'ஏஜிஎஸ்' நிறுவனம் தயாரிக்கிறது என்று தகவல் வெளியாகியுள்ளது. 'தலைவர் 169' படம் குறித்து விரைவில் அதிகாரப்பூர்வ அறிவிப்பு வெளியாகும் என்று எதிர்பார்க்கப்படுகிறது.