மாணவர் முரசு
இ-பேப்பர்
நியூயார்க்: 2026 உலகக் கிண்ணக் காற்பந்துப் போட்டி, வட அமெரிக்காவில் காற்பந்து மீதான மோகத்தை அதிகரிக்கும் என அனைத்துலக காற்பந்துச் சம்மேளனத்தின் (ஃபிஃபா) தலைவர் கியானி இன்ஃபண்டினோ கூறியுள்ளார். 2026 உலகக் கிண்ணப் போட்டியை அமெரிக்கா, மெக்சிகோ, கனடா ஆகிய நாடுகள் ஏற்று நடத்தும் என முன்னதாக அறிவிக்கப்பட்டிருந்தது.
இந்நிலையில், ஆட்டங்களை ஏற்று நடத்தும் 16 நகரங்களின் பெயர்களை ஃபிஃபா நேற்று முன்தினம் வெளியிட்டது.
அமெரிக்காவில் சியேட்டல், சான் ஃபிரான்சிஸ்கோ, லாஸ் ஏஞ்சலிஸ், கான்சஸ் சிட்டி, டல்லாஸ், அட்லாண்டா, ஹியூஸ்டன், பாஸ்டன், ஃபிலடெல்ஃபியா, மயாமி, நியூயார்க்/நியூஜெர்சி ஆகிய 11 நகரங்கள் போட்டியை நடத்தும்.
1970லும் 1986லும் உலகக் கிண்ணப் போட்டியை ஏற்று நடத்திய மெக்சிகோவில் மெக்சிகோ சிட்டி, குவாடலஹாரா, மாண்டிரே ஆகிய மூன்று நகர்கள் போட்டியை நடத்தும். ஆண்களுக்கான உலகக் கிண்ணப் போட்டியை முதன்முறையாக ஏற்று நடத்தும் கனடாவில் வேன்கூவர், டொரோண்டோ ஆகிய நகர்களில் ஆட்டங்களில் நடைபெறும்.
இவ்வேளையில், வட அமெரிக்காவில் மற்ற அனைத்து விளையாட்டுகளையும் காற்பந்து விஞ்சிவிடும் என்று சுவிட்சர்லாந்து நாட்டவரான இன்ஃபண்டினோ உறுதிபட கூறினார்.
அமெரிக்காவில் காலங்காலமாக பொழுதுபோக்கு விளையாட்டாக 'பேஸ்பால்' கருத்தப்பட்டு வருகிறது. கனடாவில் ஐஸ் ஹாக்கியே ஆதிக்கம் செலுத்தி வருகிறது. மெக்சிகோ மட்டுமே காற்பந்து விளையாட்டை ராஜாவாகக் கருதுகிறது.