மாணவர் முரசு
இ-பேப்பர்
சிங்கப்பூர் அறிவியல் நிலையத்திற்குச் செல்லும் பார்வையாளர்கள், ‘த கிளைமேட் ஷோ’ எனும் 20 நிமிடக் காணொளியைக் காணும் வாய்ப்பைப் பெறுவதோடு ‘கில்ட் டிரிப்’ எனும் விளையாட்டு அங்கத்தில் பங்கெடுக்கவும் இயலும்.
எட்டு ஆண்டுகளுக்குப் பிறகு மூன்றாவது முறையாக ஏற்பாடு செய்யப்பட்டுள்ள ‘கிளைமேட் சேஞ்ட்’ கண்காட்சி இந்த வாய்ப்புகளை வழங்குகிறது.
நீடித்த நிலைத்தன்மை, பருவநிலை மாற்றம் ஆகியவை பற்றி சிங்கப்பூரர்களுக்கு விழிப்புணர்வு ஏற்படுத்துவது நோக்கம்.
சிங்கப்பூர் அறிவியல் நிலையமும், கனடா அறிவியல் அரும்பொருளகமும் இணைந்து ‘த கிளைமேட் ஷோ’ காணொளியைத் தயாரித்துள்ளன. உள்ளூர், வெளிநாட்டுப் பருவநிலை விஞ்ஞானிகளின் நீடித்த நிலைத்தன்மை குறித்த ஆராய்ச்சி பற்றி எடுத்துரைக்கும் அந்தக் காணொளி, பொதுமக்கள் பருவநிலை மாற்றங்களுக்கு எதிரான நடவடிக்கைகளில் எவ்வாறு ஈடுபடலாம் என்பதை வலியுறுத்துகிறது.
கண்காட்சியின் விளையாட்டு அம்சமான ‘கில்ட் டிரிப்’, பலகை விளையாட்டு வடிவில் அமைக்கப்பட்டுள்ளது. இதன் மூலம், தண்ணீர்ப் பயன்பாடு, உணவு விரயம், உணவு உற்பத்தி, தொழில்நுட்பப் பயன்பாடு, மின்சாரப் பயன்பாடு, மறுசுழற்சி, நீடித்த நிலைத்தன்மை போன்றவை குறித்து பார்வையாளர்கள் தெரிந்துகொள்ளலாம்.
விளையாட்டு முடிந்தவுடன், பங்கேற்பாளர்கள் அதில் பெற்ற மதிப்பெண்களுக்கேற்ப பருவநிலை மாற்றத்திற்கு எவ்வாறு பங்காற்றி இருக்கிறார்கள் என்பதைக் குறிக்கும் ‘கிளைமேட் டிரைவர்’ உரிமத்தைப் பெறலாம். அதில் அவர்களின் அன்றாட வாழ்வில் நீடித்த நிலைத்தன்மையை இணைத்துக்கொள்வதற்கான குறிப்புகள் இருக்கும்.
நேற்று முன்தினம் சிங்கப்பூர் அறிவியல் நிலையத்தில் நடைபெற்ற கண்காட்சியின் தொடக்க விழாவிற்கு நீடித்த நிலைத்தன்மை, சுற்றுப்புற அமைச்சர் கிரேஸ் ஃபூ சிறப்பு வருகை புரிந்திருந்தார்.
சிங்கப்பூர் வரும் ஆண்டுகளில் மேலும் வெப்பமான, ஈரப்பதமிக்க பருவநிலையை எதிர்நோக்கும் என்பதையும் நூறாண்டுகளுக்கு முன் ஒப்பிடுகையில், பருவநிலை மாற்றம் விரைவாகியுள்ளது என்பதையும் சுட்டிக்காட்டிய அமைச்சர், இதற்கு அறிவியல் சார்ந்த தீர்வுகளும் மக்களின் ஒத்துழைப்பும் அவசியம் என்று கூறினார்.
இம்மாதம் 21ஆம் தேதியில் இருந்து சிங்கப்பூர் அறிவியல் நிலையத்துக்கான நுழைவுச்சீட்டுகளை வாங்கி, பார்வையாளர்கள் இந்தக் கண்காட்சியை கண்டு ரசிக்கலாம்.
