மாணவர் முரசு
இ-பேப்பர்
முன்னாள் அமெரிக்க அதிபர் டோனல்ட் டிரம்ப்பின் இல்லத்தில் அணுவாயுதங்கள் தொடர்பான ஆவணங்கள் உள்ளனவா என்பதை அறிய அந்நாட்டின் மத்திய புலனாய்வு துறை வியாழக்கிழமையன்று (11 ஆகஸ்ட்) சோதனை நடத்தியுள்ளது.
இதைத் தெரிவித்த வாஷிங்டன் போஸ்ட் செய்தி நிறுவனம், டோனல்ட் டிரம்ப்பின் பாம் பீச் கடற்கரையிலுள்ள 'மாரா லாகோ' உல்லாசத் தளத்தில் ஆவணங்கள் எதுவும் கைப்பற்றப்பட்டனவா என்பதைத் தெரிவிக்கவில்லை.
இந்த சோதனையை அரசியல் பழிவாங்கும் நடவடிக்கை என்று டிரம்ப்பின் குடியரசுக் கட்சி வர்ணித்ததைத் தொடர்ந்து மத்திய புலனாய்வுத் துறை நடத்திய சோதனைக்கு நீதிபதி பிறப்பித்த உத்தரவை வெளியிடுமாறு அமெரிக்க நீதித்துறை கேட்டுக்கொண்டுள்ளது.
அமெரிக்க நீதித்துறையின் இந்த வேண்டுகோளினால் அந்நாட்டு பொதுமக்கள் சோதனையில் என்ன மாதிரியான ஆவணங்களை புலனாய்வுத் துறை குறிவைத்துத் தேடியது என தெரிந்துகொள்ளமுடியும் என ராய்ட்டர்ஸ் செய்தித் தகவல் கூறியது.
அமெரிக்காவில் முன்னாள் அதிபர் ஒருவரின் வீடு சோதனையிடப்பட்டது இதுவே முதல்முறை.
இந்தச் சோதனை, முன்னாள் அதிபர் டிரம்ப் 2021ஆம் ஆண்டு தான் வெள்ளை மாளிகையைவிட்டுச் செல்லும்போது சட்டத்துக்கு புறம்பாக, நீதித்துறை ரகசியமானவை என்று வகைப்படுத்திய சில ஆவணங்களை அப்புறப்படுத்தினரா என்ற விசாரணை தொடர்பானது என்று நீதித்துறை கூறுகிறது.
இந்தச் சோதனைக்கு தானே முன்வந்து அனுமதி வழங்கியதாக அமெரிக்காவின் தலைமைச் சட்ட அதிகாரி மெரிக் கார்லேண்ட் விளக்கம் அளித்துள்ளார்.
அத்துடன், திரு டிரம்ப்பின் இல்லத்தில் கைப்பற்றப்பட்ட பொருள்களின் குறிப்பு ஒன்றைப் பற்றிய தகவல்களைப் பொதுமக்களுக்கு வெளியிடப்போவதாகவும் நீதித்துறை கூறியுள்ளது.
