மாணவர் முரசு
இ-பேப்பர்
ஆ. விஷ்ணு வர்தினி
செந்தோசா தீவு, சுற்றுப்பயணிகளின் உல்லாசத் தலம் மட்டுமன்று. அது சிங்கப்பூரின் மரபுடை மையைப் பறைசாற்றும் ஒரு தலமும் கூட.
செந்தோசாவின் வரலாற்றுச் சிறப்புகளைப் பற்றி மேலும் அறிய, மூன்று மரபுடைமைப் பாதைகளை தேசிய மரபுடைமைக் கழகமும் செந்தோசாத் தீவு மேம்பாட்டு கூட்டு நிறுவனமும் இணைந்து அமைத்துள்ளன.
ஒவ்வொரு பாதையும் செந்தோசாவின் ஒவ்வொரு பரிமாணத்தைநமக்குக் காட்டும்.
'கம்போங் மற்றும் ராணுவப் பயிற்சியிடம்' சேர்ந்த பாதை, செந்தோசா மீன்பிடிக் கிராமமாக விளங்கிய காலத்துக்கு நம்மை அழைத்துச் செல்லும்.
செந்தோசா பண்டையக் காலத்தில் புலாவ் ப்லாகாங் மாதி என்று அழைக்கப்பட்டது. மக்களின் வாழ்வாதாரத்துக்கு இத்தீவு கை கொடுத்து வந்தது.
புலாவ் ப்லாகாங் மாதியில் ஓராங் லாவுட் குடியினர் பலகாலமாக வசித்து வந்தனர். அவர்களது வாழ்க்கைமுறையைப் பற்றி முதல் பாதையானது எடுத்துக்கூறும்.
மேலும், உல்லாச விடுதிகளாக மறுசீரமைக்கப்பட்டுள்ள கடந்தகால ராணுவப் பயிற்சி மையங்களின் பின்னணியையும் மக்கள் அறிந்து கொள்வர்.
'அரண்கள்' பாதையானது பழைய சிங்கப்பூரின் தற்காப்பு முறைகளையும் ராணுவ வரலாற்றையும் நமக்குக் காட்டும்.
கடைசி பாதையான, 'செந்தோசாவின் நினைவுகள்' என்ற பாதை, முற்காலத்திலும் தற்காலத்திலும் இருந்துவரும் செந்தோசாவின் உல்லாசத் தலங்களைச் சுட்டிக்காட்டுகின்றது.
இம்மூன்று பாதைகளும் செந்தோசாவில் உள்ள 30 மரபுடைமைத் தலங்களுக்கு நம்மை அழைத்துச் செல்லும்.
புகழ்பெற்ற ஃபோர்ட் சிலோசோ, கேபிள் கார், கண்ணைக் கவரும் சிலோசோ கடற்கரை ஆகியவையும் இவற்றில் இடம்பெற்றுள்ளன.
செந்தோசா தனது 50 ஆண்டு நிறைவை இவ்வாண்டு கொண்டாடுகிறது. அதனை முன்னிட்டு, 'முடிவிலா கண்டுபிடிப்புகள்' என்ற கருப்பொருளுக்கேற்ப, செந்தோசா மரபுடைமைப் பாதைகள் மக்களுக்குப் புதுமையான அனுபவத்தை வழங்கும்.
2020ஆம் ஆண்டில் தொடங்கப்பட்ட செந்தோசா மரபுடைமை ஆராய்ச்சிப் பணிகள், கொவிட்-19 சூழலால் ஒத்திவைக்கப்பட்டிருந்தன.
16, 17ஆம் நூற்றாண்டுகளில் இருந்து தற்போது வரை உள்ள பதிவுகளும் சான்றுகளும் இம்முயற்சியை வடிவமைக்கப் பயன்படுத்தப்பட்டன.
செந்தோசா மரபுடைமைப் பாதை களின் வரைபடத்தையும் துணை வழிகாட்டிகளையும் காண www.roots.gov.sg என்ற இணையத்தளத்தை பொதுமக்கள் நாடலாம்.
இவ்வாண்டின் இறுதிக்குள் மேலும் இரண்டு மரபுடைமைப் பாதைகளைத் தேசிய மரபுடைமைக் கழகம் அறிமுகப்படுத்த இருக்கி றது.
