தனியார் வாகன வாடகை சேவையை நல்கும் நிறுவனங்களான ‘கிராப்’பும் ‘கோஜெக்’கும் தங்களுக்கு இடையிலான உடன்பாட்டை எட்டுவதற்கான பணிகளில் குறிப்பிடத்தக்க முன்னேற்றத்தை அடைந்திருப்பதாகத் தகவல்கள் வெளிவந்துள்ளன.
இரு நிறுவனங்களும் ஒரு நிறுவனமாக இணைவதற்கான அந்த ஒப்பந்தம் நிறைவேற்றப்பட்டால் அதுவே தென்கிழக்காசியாவில் இந்த வகையைச் சேர்ந்த ஒப்பந்தங்களில் ஆகப் பெரிதாக இருக்கும்.
தென்கிழக்காசியாவின் ஆக மதிப்புமிக்க இந்த நிறுவனங்கள், தங்களுக்கு இடையிலான வேறுபாடுகளைப் பெருமளவில் களைந்துள்ளன.
இருந்தபோதும், இந்த ஒப்பந்தங்களின் சில கூறுகள் தொடர்பில் தனிப்பட்ட பேச்சுவார்த்தைகள் தொடர்வதாகக் கூறப்படுகிறது. ஒரு நிறுவனமாக இணைந்த நிலையில் ‘கிராப்’ மற்றும் ‘கோஜெக்’ சந்தையில் பங்குகளை விற்க முற்பட முனைவதாகவும் இது குறித்த விவரங்களைத் தெரிந்துள்ள பெயர் குறிப்பிடப்படாத சிலர் தெரிவித்துள்ளனர்.
இந்த நிறுவனங்களின் மூத்த தலைவர்கள், ஒப்பந்த விவரங்களை மறுஆய்வு செய்வதாகவும் இதில் கிராப் நிறுவனத்தின் முதலீட்டாளராக ஸாஃப்ட்பெங்க் குழுமத்தின் திரு மசாயோஷி சன் பங்குபெறுவதாகவும் கூறப்படுகிறது.
ஒரே நிர்வாகக் குடையில் இணையும் இந்த நிறுவனங்களுக்கு கிராப்பின் இணை நிறுவனர் ஆண்டனி டான் தலைமை நிர்வாகியாக செயல்படலாம். அத்துடன் ‘கோஜெக்’ நிர்வாகிகள் இந்த வர்த்தகத்தை இந்தோனீசியாவில் ‘கோஜெக்’ சின்னத்தின்கீழ் நடத்துவர் என்று இவர்கள் கூறுகின்றனர்.
ஆயினும், தற்போதைக்கு ஒப்பந்தம் தொடர்பிலான பேச்சுவார்த்தைகள் உறுதியான கட்டத்தை இன்னும் எட்டவில்லை என்று கூறப்படுகிறது. இது குறித்து கிராப், கோஜெக், ஸாஃப்ட்பெங்க் நிறுவனங்களின் பிரதிநிதிகள் எவரும் அதிகாரபூர்வமாக கருத்துக்கூற மறுத்துள்ளனர்.