மாணவர் முரசு
இ-பேப்பர்
அக்கம்பக்க வட்டாரமான ஹவ்காங்கின் வரலாற்றுச் சிறப்புகளையும் வளர்ச்சிப் பாதையையும் அந்தப் பகுதி மக்களின் வாழ்க்கையையும் எடுத்துக்கூறும் விதத்தில் புதிய மரபுடைமைப் பாதை அமைக்கப்பட்டுள்ளது.
இந்த ஹவ்காங் மரபுடைமைப் பாதையில், கன்னி மரியாள் நேடிவிட்டி தேவாலயம், ஹவ்காங் டூ மு குங் கோயில் ஆகிய இரு தேசிய நினைவுச் சின்னங்களுடன் ஹாஜி யூசோஃப் பள்ளிவாசல், செயின்ட் பால் தேவாலயம், யுன் காய் ஜி கொங் கோயில் உள்ளிட்ட வழிபாட்டுத் தலங்களும் இடம்பெற்று உள்ளன.
சமயப் பரப்பாளர் பணிகளுக்காக 1800களில் சீனாவிலிருந்து சிங்கப்பூருக்கு வந்த கத்தோலிக்க தியோச்சு குடியேறிகள் இங்கு வந்ததைத் தொடர்ந்து அப்பகுதியில் வழிபாட்டுத் தலங்கள் அமைக்கப்பட்டன.
ஹவ்காங் மரபுடைமைப் பாதையில் இடம்பெற்றுள்ள கன்னி மரியாள் நேட்டிவிட்டி தேவாலயம் அவற்றில் ஒன்று. அது கிட்டத்தட்ட 200 ஆண்டுகள் பழமையானது.
அப்பர் சிராங்கூன் சாலையில் 3.5 கிலோ மீட்டர் தூரத்தில் அமைந்துள்ள இந்த மரபுடைப் பாதையில், வழிபாட்டு இடங்கள், பழைய வர்த்தகங்கள் உள்ளிட்ட எட்டு முக்கியத்துவம் பெற்ற இடங்கள் உள்ளன.
பார்ட்லி சாலையில் அமைந்துள்ள ஸ்ரீ ராமகிருஷ்ணா மடமும் அவற்றில் ஒன்று. 1943ல் ராமகிருஷ்ணா சிறுவர் இல்லமாக தொடங்கப்பட்ட இந்த இடத்தில் வளர்ந்து, சமூகத்தில் உயர்ந்த நிலைக்கு வந்தவர்கள் பலர்.
இரண்டாம் உலகப் போரினால் பாதிக்கப்பட்ட சிறார்களுக்கு அடைக்கலம் அளித்த இந்த இல்லத்தில் இன்றும் வசதிகுறைந்த, பராமரிப்புத் தேவைப்படும் சிறார்கள் தங்கியுள்ளனர்.
தேசிய மரபுடைமைக் கழகத்தின் 20வது மரபுடைமைப் பாதையான இதுதான், ஆக அதிகளவில் சமூகப் பங்களிப்பைக் கொண்டுள்ளது என்று கழகம் நேற்று வெளியிட்ட அறிக்கையில் தெரிவித்தது.
இந்த வட்டாரத்தைப் பற்றி நன்கு அறிந்த 28 பேர் நேர்காணல்கள், புகைப்படங்கள் வழியாக இந்த வரலாற்றுப் பதிவுக்குப் பங்களித்துள்ளனர்.
“வரலாற்றுக் குறிப்புகளைவிட, இதுபோன்ற அங்கு வாழ்ந்த மக்களின் பங்களிப்புகள் இந்த மரபுடைமைப் பாதையை பார்வையாளர்களுக்கு சுவாரஸ்யமானதாக்குகின்றன,” என்றார் கழகத்தின் கொள்கை, சமூகப் பிரிவுக்கான துணைத் தலைமை நிர்வாகி அல்வின் டான்.
கடந்த 1979ஆம் ஆண்டில் குடியிருப்பு வட்டாரமாக வீடமைப்பு வளர்ச்சிக் கழகத்தால் அறிவிக்கப்பட்ட ஹவ்காங் நகரத்தின் பெயர் ‘அவ் காங்’ என்ற தியோச்சு (சீன கிளைமொழி) சொல்லிலிருந்து உருவானது.
அப்பர் சிராங்கூன் சாலைக்கு இணையாக இன்னும் ஓடும் சிராங்கூன் ஆற்றைக் குறிக்கும் சொல் அது.
ஹவ்காங் மரபுடைமைப் பாதையின் வரைபடம், வழிகாட்டிக் குறிப்புகள் தமிழ், ஆங்கிலம், சீனம், மலாய் ஆகிய நான்கு தேசிய மொழிகளிலும் இடம்பெற்றுள்ளன. தேசிய மரபுடைமைக் கழகத்தின் Roots.sg என்ற இணையத்தளத்தில் காணலாம்.
அச்சுப் பிரதிகளை மரபுடைமைக் கழக அரும்பொருளகங்கள், அல்ஜுனிட்-ஹவ்காங் நகர மன்றம், ஹவ்காங், பொங்கோல், பாய லேபார், கோவன், யூனோஸ் ஆகிய சமூக மன்றங்களிலும் அல்ஜுனிட், காக்கி புக்கிட் சமூக நிலையங்களிலும் பெறலாம்.
