இவ்வாண்டின் முதல் ஐந்து மாதங்களில் 87 வீடமைப்பு வளர்ச்சிக் கழக வீடுகள் குறைந்தபட்சம் $1 மில்லியன் விலையில் கைமாறி உள்ளன. கடந்த ஆண்டு முழுவதும் $1 மில்லியன் மதிப்புள்ள 82 வீடுகள் மட்டுமே விற்கப்பட்டன.
இதன் மூலம் இவ்வாண்டில் விற்கப்பட்ட $1 மில்லியன் வீடு
களின் எண்ணிக்கையே ஆக அதிகம் என்ற சாதனை நிகழ்த்தப்பட்டு உள்ளது.
கடந்த 2012ஆம் ஆண்டில்தான் வீவக வீடு ஒன்று $1 மில்லியன் என்ற அளவில் விற்கப்பட்ட முதல் வீடு. அந்த ஆண்டில் அந்த மதிப்புக்கு இரு வீடுகள் மட்டுமே விலைபோயின.
மொத்தமாக, நேற்று முன்
தினம் மே 31 வரை 389 வீவக வீடுகள் $1 மில்லியனுக்கு மேல் விற்கப்பட்டு உள்ளன. அத்துடன் இந்த அளவுக்கு விலை உள்ள வீடுகள் மீதான மோகம் அதிகரித்து வருவதாகவும் கொவிட்-19 கொள்ளைநோய் நிலவரம் அதற்குத் தடைபோடவில்லை என்றும் தெரிய வந்துள்ளது.
கடந்த மாதம் ஹாலந்து டிரைவ் புளோக் 18சி-யில் 117 சதுர மீட்டர் பரப்பளவு கொண்ட ஐந்தறை வீடு ஒன்று $1.21 மில்லியனுக்கு விற்கப்பட்டது.
2005ஆம் ஆண்டில் அறிவிக்கப்பட்ட தேர்ந்தெடுக்கப்பட்ட ஒட்டுமொத்த மறுமேம்பாட்டுத் திட்டத்தின் மாற்றுத் தளத்தில் கட்டப்பட்டது அந்த ஹாலந்து டிரைவ் புளோக். விற்கப்பட்டபோது அந்த புளோக் வீட்டின் குத்தகை 90 ஆண்டுகள், ஐந்து மாதங்கள் எஞ்சியிருந்தன.
இதேபோல இவ்வாண்டின் ஜனவரியிலும் பிப்ரவரியிலும் இரு வீடுகள் $1.21 மில்லியனுக்கு விற்கப்பட்டன. அதன் ஒரு வீடு பீஷான் ஸ்திரீட் 24லும் மற்றொரு வீடு புக்கிட் தீமாவில் உள்ள புளோக் 2 தோ யி டிரைவிலும் அந்தத் தொகைக்குக் கைமாறின.
ஏப்ரல் மாதம், பீஷான் ஸ்திரீட் 24ல் நேச்சுரா லாஃப்ட்டில் உள்ள வடிவமைப்பு, கட்டுமானம் மற்றும் விற்பனைத் திட்டத்தில் கட்டப்பட்ட 120 சதுர மீட்டர் அளவுள்ள ஐந்தறை வீடு ஒன்று $1.25 மில்லியனுக்கு விலைபோனது. இதன் எஞ்சிய குத்தகைக் காலம் 89 ஆண்டுகள், ஐந்து மாதங்கள்.
ஆக அதிக விலைக்கு விற்கப்பட்ட இரண்டாவது வீவக வீடு இது. கடந்த ஆண்டு செப்டம்பர் மாதம் பினக்கல்@டக்ஸ்டனில் ஐந்தறை வீடு ஒன்று $1.258 மில்லி யனுக்கு விற்கப்பட்டு ஆக அதிக விலைபோன மறுவிற்பனை வீடு என்னும் சாதனையைப் பெற்றிருந்தது.
தனியார் வீட்டு விலைகள் தொடர்ந்து அதிகரித்து வருவதன் காரணமாக $1 மில்லியன் வீவக வீடுகளுக்கான தேவை இன்னும் வலுவடையும் என்று தாம் எதிர்பார்ப்பதாக 'ஆரஞ்சுடீ அண்ட் டை' என்னும் சொத்துச் சந்தை ஆராய்ச்சி மற்றும் பகுப்பாய்வு நிறுவனத்தின் அதிகாரி திருவாட்டி கிறிஸ்டின் சன் கூறினார்.