மாணவர் முரசு
இ-பேப்பர்
ரெட் சுவாஸ்டிக்கா பள்ளிக்கு வெளியே பாதுகாவல் அதிகாரியின் உயிருக்கு ஆபத்து விளைவித்ததாகச் சந்தேகிக்கப்படும் 'பென்ட்லீ' வாகன ஓட்டுநர் மீது கவனமற்ற செயலின் மூலம் காயம் ஏற்படுத்தியதாக ஒரு குற்றச்சாட்டு சுமத்தப்பட்டுள்ளது. தகுந்த காப்புறுதியின்றி வாகனத்தை ஓட்டியதாகவும் 61 வயது நியோ ஹொங் சை சந்தேகிக்கப்படுகிறார்.
அச்சம்பவம் கடந்த ஜனவரி மாதம் நிகழ்ந்தது.
கணக்கியல், நிறுவனக் கட்டுப்பாட்டு ஆணையத்தின் இணையத்தளத்தில் தேடியபோது நியோ ஹொங் சை 'ஜியா சியூ கொன்ட்ரேக்டர்ஸ்' கட்டுமான நிறுவனத்தின் உரிமையாளர் எனத் தெரியவந்தது. இவர் வேறு இரண்டு நிறுவனங்களின் இயக்குநராகவும் பதவி வகிக்கிறார்.
சம்பவம் நிகழ்ந்தபோது இவரின் மகன்தான் 'பென்ட்லீ' வாகனத்தின் உரிமையாளராக இருந்தார் என்று காவல்துறையும் நிலப் போக்குவரத்து ஆணையமும் இணைந்து வெளியிட்ட அறிக்கையில் குறிப்பிடப்பட்டது. 'பென்ட்லீ' வாகனத்தின் அடையாள எண் பட்டையை மாற்றி அதை காப்புறுதி இல்லாமல் தனது தந்தையை ஓட்ட அனுமதித்ததாக 28 வயது கிலின் நியோ ஜியா மீது ஒரு குற்றச்சாட்டு சுமத்தப்பட்டது. பயன்படுத்தப்பட்ட வாகனங்களை விற்கும் இரண்டு நிறுவனங்களில் கிலின் இயக்குநராகப் பதவி வகிப்பதாகக் கணக்கியல், நிறுவனக் கட்டுப்பாட்டு ஆணையத்தின் இணையத்தளத்தில் தெரிவிக்கப்பட்டுள்ளது.
கடந்த ஜனவரி மாதம் 11ஆம் தேதியன்று சம்பந்தப்பட்ட 'பென்ட்லீ' வாகனத்தின் இரு புறங்களில் உள்ள அடையாள எண் பட்டைகளில் கிலின் மாற்றங்களைச் செய்ததாகச் சந்தேகிக்கப்படுகிறது என்று நீதிமன்ற ஆவணங்களில் குறிப்பிடப்பட்டுள்ளது. மேலும், அன்று காலை ஆறரை மணியளவில் அவர் காப்புறுதி வைத்திராத தனது தந்தையிடம் வாகனத்தை ஓட்டக் கொடுத்ததாகவும் சொல்லப்படுகிறது.
அதற்கு சுமார் ஒரு மணி நேரத்திற்குப் பிறகு நியோ ஹொங் சை, ரெட் சுவாஸ்டிக்கா பள்ளிக்கு வெளியே கவனமற்ற செயலை மேற்கொண்டு பாதுகாவல் அதிகாரி நியோ ஆ வாட்டுக்குக் காயம் ஏற்படுத்தியதாகக் கூறப்படுகிறது.
அச்சம்பவம் பதிவான காணொளியை இணையத்தில் பலர் பகிர்ந்துகொண்டனர்.
கவனமற்ற செயலின் மூலம் காயம் ஏற்படுத்திய குற்றம் நிரூபிக்கப்பட்டால் குற்றவாளிக்கு அதிகபட்சமாக ஓராண்டுச் சிறைத் தண்டனையும் 5,000 வெள்ளி அபராதமும் விதிக்கப்படலாம். காப்புறுதி இல்லாமல் வாகனத்தை ஓட்டிய குற்றம் நிரூபிக்கப்பட்டால் குற்றவாளிக்கு அதிகபட்சமாக மூன்று மாதச் சிறைத் தண்டனையும் 1,000 வெள்ளி அபராதமும் விதிக்கப்படலாம். அனைத்து ரக வாகனங்களை ஓட்ட தடையும் விதிக்கப்படலாம்.
