சிங்கப்பூரின் முக்கிய ஏற்றுமதிகள் எதிர்பாராத வீழ்ச்சியைக் கண்டுள்ளன. தொடர்ந்து எட்டாவது மாதமாக எண்ணெய் சாரா உள்நாட்டு ஏற்றுமதி மே மாதத்திலும் சரிந்துள்ளது.
ஏப்ரல் மாத 9.8 விழுக்காட்டு வீழ்ச்சியைத் தொடர்ந்து ஆண்டு அடிப்படையில் மே மாதத்தில் 14.7 விழுக்காடு வீழ்ச்சிகண்டது என எண்டர்பிரைஸ் சிங்கப்பூர் நேற்று வெளியிட்ட புள்ளிவிவரங்கள் காட்டின.
புளூம்பெர்க் கருத்துக் கணிப்பில் பொருளியல் வல்லுநர்கள் கணித்திருந்த 7.7% வீழ்ச்சியைவிட இது அதிகம்.
பணவீக்கத்தைக் கணக்கில்கொண்டபின் எண்ணெய் சாரா உள்நாட்டு ஏற்றுமதி 7.6 விழுக்காடு குறைந்துள்ளது. இது ஏப்ரலில் 3.1% ஆக இருந்தது.
மே மாத எண்ணெய் சாரா உள்நாட்டு ஏற்றுமதி சரிவுக்கு மின்னணுத் துறை ஏற்றுமதிகள் மிகப்பெரிய பங்காற்றியது.ஆண்டு அடிப்படையில் இது 27.2% வீழ்ச்சியடைந்தது. ஏப்ரல் மாத 23.3% சரிவைவிட இது அதிகம்.
ஆண்டு அடிப்படையில், ஏப்ரல் மாத 23.3 விழுக்காடு சரிவைத் தொடர்ந்து மே மாதத்தில் 27.2 விழுக்காடு குறைந்தது. ஒருங்கிணைந்த மின்சுற்று (ஐசி), அதன் பாகங்கள், டிஸ்க் மீடியா பொருள்களின் 48.7 விழுக்காடு ஏற்றுமதி வீழ்ச்சி இதில் பெரும்பங்கு வகித்தது.
மின்னணு அல்லாத எண்ணெய் சாரா ஏற்றுமதி ஏப்ரல் மாத 5.8% சரிவைத் தொடர்ந்து மேயில் 10.7 விழுக்காடு சுருங்கியது. சிறப்பு இயந்திரங்கள், பெட்ரோலிய ரசாயனம், மருந்துப்பொருள் களால் இந்தச் சரிவு ஏற்பட்டது.
2022ஆம் ஆண்டின் மே மாதத்துடன் ஒப்பிடுகையில் சென்ற மே மாதத்தில் மருந்துப் பொருட்களின் ஏற்றுமதி 14% குறைந்துள்ளது. இது மார்ச்சில் 27.8%, ஏப்ரலில் 26.7% மிதமான வளர்ச்சியைக் கண்டது.
ஏப்ரல் மாத 2.6 விழுக்காட்டு வளர்ச்சியைக் கண்டிருந்த நிலையில், எண்ணெய் சாரா ஏற்றுமதி மாதாந்திர அடிப்படையில் மேயில் 14.6 விழுக்காடு குறைந்து $13.8 பில்லியனாக இருந்தது.
2022 மே மாதத்துடன் ஒப்பிட, கடந்த மே மாதத்தில் மொத்த வர்த்தகம் 17.9% குறைந்துள்ளது, இது ஏப்ரல் மாதத்தில் 18.9 விழுக்காடு சுருக்கம் கண்டிருந்தது.
ஹாங்காங், மலேசியா, தைவான் உள்ளிட்ட சிங்கப்பூரின் முதல் 10 சந்தைகளில் பெரும்பாலானவற்றுக்கான ஏற்றுமதி வீழ்ச்சியைக் கண்டது.
எனினும், சீனா, அமெரிக்காவிற்கான இப்பொருள்களின் ஏற்றுமதி முறையே 3.7%, 4.8% அதிகரித்துள்ளது.
எண்டர்பிரைஸ் சிங்கப்பூரின் அறிக்கையின்படி, ஜனவரி முதல் மே வரையிலான காலத்தில் எண்ணெய் சாரா பொருள்களில் 15.2 விழுக்காட்டு பங்கைக் கொண்டு, சிங்கப்பூருக்கான இரண்டாவது பெரிய ஏற்றுமதி சந்தையாக சீனா உள்ளது.
சீனாவுக்கான சிங்கப்பூரின் ஏற்றுமதி சுருங்கி வரும்நிலையில், மே மாத 3.7% அதிகரிப்பு 2022 ஜூன் மாத 2.1% அதிகரிப்புக்குப் பிறகான முதல் அதிகரிப்பு ஆகும்.
கடந்த மாதம் வெளியிடப்பட்ட சிங்கப்பூரின் காலாண்டு வர்த்தகச் செயல்பாட்டின் மதிப்பாய்வின்படி, எண்ணெய் சாரா உள்நாட்டு ஏற்றுமதி முந்தைய காலாண்டின் 14 விழுக்காடு சரிவைத் தொடர்ந்து, இந்த ஆண்டின் முதல் காலாண்டில் 16.2 விழுக்காடு சரிந்துள்ளது
எண்டர்பிரைஸ் சிங்கப்பூர் அதன் ஏற்றுமதி கணிப்பைக் குறைத்துள்ளது.
இந்த ஆண்டு எண்ணெய் சாரா ஏற்றுமதி 8 முதல் 10 விழுக்காடு வரை வீழ்ச்சியடையும் என்று அது கணித்துள்ளது. முன்னர் இந்த வீழ்ச்சி 0 முதல் 2 விழுக்காடு வரை இருக்கும் என அது கணித்திருந்தது.