மாணவர் முரசு
இ-பேப்பர்
ஹைதராபாத்: இந்தியாவின் ஹைதராபாத் நகரில், ‘ஸொமேட்டோ’ நிறுவனச் சீருடை அணிந்து அதன் உணவு விநியோகப் பையைச் சுமந்தபடி குதிரையில் செல்லும் ஆடவரின் காணொளி இணையத்தில் பரவி வருகிறது.
அவர் மிக லாவகமாகக் குதிரைச் சவாரி செய்வதைக் காணொளியில் காண முடிகிறது.
பரபரப்பான சாலையில் அந்த ஆடவர் குதிரையில் சவாரி செய்வதைப் பலரும் ஆச்சரியத்துடன் பார்வையிட்டனர்.
எக்ஸ் தளத்தில் இச்சம்பவத்தின் காணொளி பதிவிடப்பட்டுள்ளது.
பெட்ரோல் பற்றாக்குறை குறித்த அச்சத்தால் ஹைதராபாத் பெட்ரோல் நிரப்புமிடங்களில் நீண்ட வரிசைகள் காணப்படுவதாகவும் அதனால்தான் ‘ஸொமேட்டோ’ விநியோகிப்பாளர் குதிரையில் செல்ல முடிவெடுத்திருப்பார் என்றும் பயனாளர் ஒருவர் பதிவிட்டுள்ளார்.
இந்தியாவின் பல பகுதிகளில் லாரி ஓட்டுநர்கள் வேலை நிறுத்தப் போராட்டத்தில் ஈடுபடுவதால் பெட்ரோல் நிரப்புமிடங்களில் எரிபொருள் விநியோகம் பாதிக்கப்பட்டிருப்பதாகக் கூறப்படுகிறது.
காணொளியில் காணப்படும் ஆடவர் உண்மையிலேயே ‘ஸொமேட்டோ’ ஊழியரா என்பது இன்னும் உறுதிப்படுத்தப்படவில்லை.
சென்ற ஆண்டு ‘ஸ்விக்கி’ உணவு விநியோக நிறுவனச் சீருடையில் ஆடவர் ஒருவர் குதிரைச் சவாரி செய்த காணொளி இணையத்தில் பரவியது. ஆனால் பிறகு, அவர் அந்நிறுவனச் சீருடையை இரவல் பெற்று அணிந்தவர் என்று கண்டுபிடிக்கப்பட்டது.
