அமெரிக்க துணை அதிபராக தேர்தலில் வெற்றி பெற்றுள்ள திருவாட்டி கமலா ஹாரிஸ், 55, பல சாதனைகளுக்குச் சொந்தக்காரர் ஆகியுள்ளார்.
அமெரிக்காவின் துணை அதிபர் பதவியில் அமரும் முதல் பெண். முதல் இந்திய-மேற்கிந்திய பெண். தெற்காசியாவைச் சேர்ந்த முதல் அமெரிக்கப் பெண். தமிழ்நாட்டைப் பூர்வீகமாகக் கொண்ட முதல் பெண். இப்படி அவருக்கான சாதனைப் பட்டியல் நீளுகிறது. அமெரிக்க தேர்தல் வரலாற்றில் இதற்கு முன்னர் இரு பெண்கள் துணை அதிபர் பதவிக்குப் போட்டியிட்டனர். 1984ஆம் ஆண்டில் ஜனநாயகக் கட்சியைச் சேர்ந்த ஜெரல்டின் ஃபெராரோ, 2008ஆம் ஆண்டில் குடியரசுக் கட்சி சார்பாக சாரா பாலின் ஆகியோர் அந்தப் பெண்கள். ஆனாலும் இவ்விரு பெண்களும் தேர்தலில் வெற்றி பெறவில்லை.
இந்தத் தேர்தலுக்கு முன்புவரை அமெரிக்காவின் இரு
பெரும் கட்சிகளான குடியரசுக் கட்சியும் ஜனநாயகக் கட்சியும் இதுவரை கறுப்பினப் பின்னணியைக் கொண்ட ஒருவரை வேட்பாளராகக் களமிறக்கியதில்லை.
திருவாட்டி கமலாவின் தாயார் திருவாட்டி சியாமளா கோபாலன் தமிழகத்தின் மன்னார்குடி அருகே உள்ள துளசேந்திரபுரம் கிராமத்தைச் சேர்ந்தவர் என்பது பலரும் அறிந்ததே. இம்மாதம் 3ஆம் தேதி அதிபர் தேர்தலுக்கான வாக்களிப்பு நடைபெற்ற நேரத்தில் திருவாட்டி கமலா வெற்றிபெற வேண்டி துளசேந்திரபுரம் கிராமத்தில் உள்ள அவரது தாய்வழி குலதெய்வமான அய்யனாருக்கு பூசை செய்து சிறப்பு வழிபாடுகள் நடத்தப்பட்டன. அவர் வெற்றிபெற வாழ்த்தி கிராமம் முழுவதும் ஏராளமான பதாகைகள் வைக்கப்பட்டு இருந்தன. துணை அதிபராக வென்றுவிட்டார் என்ற தகவல் நேற்றுக் காலை வெளியானதுமே சுமார் 350 பேர் வசிக்கும் துளசேந்திரபுரம் கிராமம் முன்கூட்டியே எழுந்து வெற்றியைக் கொண்டாடத் தொடங்கியது.
கிராம மக்கள் பட்டாசுகளை வெடித்தனர்; இனிப்புகளைப் பரிமாறி மகிழ்ந்தனர். பெண்கள் பலரும் தங்களது வாசலில் திருவாட்டி கமலாவுக்கு வாழ்த்துத் தெரிவிக்கும் வண்ணக் கோலங்களை வரைந்தனர். ஒட்டுமொத்த கிராமமும் மகிழ்ச்சியில் மூழ்கி இருந்ததாக ஊடகத் தகவல்கள் தெரிவித்தன.
துணை அதிபராக வெற்றி பெற்றதும் உரையாற்ற வந்த திருவாட்டி கமலா ஹாரிஸ், பெண் வாக்குரிமையைப் பிரதிபலிக்கும் விதமாக வெண்ணிற உடை அணிந்திருந்தார். அமெரிக்காவில் பெண்கள் தேர்தலில் வாக்களிக்கும் உரிமை பெற்ற சுமார் நூறாண்டுகளுக்குப் பின் பெண் ஒருவர் அந்நாட்டின் உயரிய பதவிகளில் ஒன்றில் அமர இருப்பது வரலாற்று அபூர்வம். "ஜனநாயகம் என்பது ஒரு நிலை அல்ல; செயல்," என இதற்கு முன்னர் நாடாளுமன்ற உறுப்பினர் ஜான் லுவிஸ் தெரிவித்த கருத்தை திருவாட்டி கமலா தமது வெற்றி உரையில் நினைவூட்டினார். 19 வயதில் தமது தாயார் இந்தியாவில் இருந்து அமெரிக்கா வந்தபோது இப்படி ஒரு சிறப்பான தருணம் நிகழும் என்று சிறிதும் எதிர்பார்த்திருக்க மாட்டார் என்றார் அவர்.