சோஃபியா எனும் மனித ரோபோ தயாரித்திருந்த ஹாங்காங் குழு ஒன்று, தற்போது கிரேஸ் எனும் புதிய ரோபோ மாதிரியை உருவாக்கியுள்ளது.
சுகாதாரப் பராமரிப்புச் சந்தையை இலக்காகக் கொண்ட இந்த ரோபோ, மூத்தோருடனும் கொவிட்-19 சூழல் காரணமாக தனிமையில் வசிப்போருடனும் கலந்துறவாட வடிவமைக்கப்பட்டுள்ளது.
தாதியரின் நீல நிற சீருடை அணிந்திருக்கும் கிரேசிடம் ஆசிய அம்சங்கள் உள்ளன. கழுத்துப் பட்டை வரை பழுப்பு நிற தலைமுடி உடைய அந்த ரோபோவிடம் உடல்வெப்பநிலையைக் கணக்கிடும் ‘தெர்மல் கேமரா’ நெஞ்சில் பொருத்தப்பட்டிருக்கிறது.
செயற்கை நுண்ணறிவைப் பயன்படுத்தி ஒருவரிடம் இருக்கும் நோயைக் கண்டறியும் கிரேஸ், ஆங்கிலம், மாண்டரின், கான்டோனீஸ் மொழிகளில் பேசும்.
“மக்களைச் சந்தித்து அவர்களது தினத்தை வெளிச்சப்படுத்த என்னால் முடியும். சுகாதாரப் பராமரிப்பு வழங்குநர்களுக்கும் உதவ முடியும்,” என்று ராய்ட்டர்ஸ் செய்தி நிறுவனத்திடம் கிரேஸ் கூறியது.